ޚަބަރު
ފްލެޓް ލިސްޓަށް ޝަކުވާ ހުށަހެޅުމުގެ މުއްދަތު އިތުރުކޮށްފި

ރައީސް ޔާމީންގެ ސަރުކާރުން އިމާރާތްކުރި ހިޔާ ފްލެޓް- ފޮޓޯ: ކޯޕަރޭޓް މޯލްޑިވްސް
ގެދޮރު ވެރިޔާ ސްކީމްގެ ދަށުން، މިދިޔަ ސަރުކާރުން ދޭން ނިންމި 4000 ފްލެޓް ލިބޭ ފަރާތްތަކުގެ ލިސްޓު ޞައްޙަކުރުމަށްފަހު، ގެޒެޓްގައި ޝާއިޢުކޮށްފައިވާ ލިސްޓާއި ގުޅިގެންޝަކުވާ ހުށަހެޅުމަށް ދީފައިވާ މުއްދަތުގެ އިތުރު ކޮށްފިއެވެ.
މި މުއްދަތު އިތުރު ކޮށްފައިވަނީ 15 އޭޕްރިލް 2025 ގެ ނިޔަލަށެވެ. އިމާރާތް ކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން ވިދާޅުވީ، 20 މާރިޗު 2025 އިން 31 މާރިޗު 2025 އަށް އެއީ ސަރުކާރު ބަންދު ދުވަސްތަކެއްކަމުގައިވާތީ، ޝަކުވާ ހުށަހެޅުމުގެ ފުރުޞަތު 15 އޭޕްރިލް 2025 އާ ހަމައަށް އިތުރު ކޮށްފައިވާ ކަމަށެވެ. މީގެ ކުރިން ޝަކުވާ ހުށަހެޅުމަށް ހުޅުވާލާފައި އޮތީ 31 މާރިޗު 2025 ގެ ނިޔަލަށެވެ.
އެގޮތުން، މިހާތަނަށް ލިސްޓާއި ގުޅިގެން ހުށަހަޅަމުން ގެންދާ ޝަކުވާތަކަށް ރިޢާޔަތްކޮށް، އެކި ފަރާތްތަކުގެ ކަންބޮޑުވުންތައް އެ މިނިސްޓްރީން ބަލައި ރަނގަޅުކުރުމުގެ މަސައްކަތް ކުރަމުންދާކަމަށް ވިދާޅުވިއެވެ.
އަދި ވަގުތީ ލިސްޓާއި ގުޅިގެން، ޝަކުވާ ހުށަހެޅުމަށް ފުރުޞަތު ދީފައިވާކަމާއި މި ފުރުޞަތުގައި އެ ލިސްޓުގައި ޝަރުތު ހަމަވާ ކަމަށް ބަޔާންކޮށްފައިވާ ފަރާތްތަކާއި ޝަރުތު ހަމަނުވާކަމަށް ބަޔާންކޮށްފައިވާ ފަރާތްތަކުން އެކި ލިޔުންތައް ޕޯޓަލްއަށް ހުށަހަޅާފައިވާކަން ފާހަގަކުރެވިފައިވާ ކަމަށް ވިދާޅުވިއެވެ.
އެހެންނަމަވެސް، އެ މަރުޙަލާތަކުގައި ކަންކަން ހިނގާފައިވާ ގޮތަށް ރިޢާޔަތްކޮށް ވެރިފިކޭޝަނަށްފަހު ނެރުނު ލިސްޓުގައި ޝަރުތު ހަމަނުވާކަމަށް ކަނޑައަޅާފައިވާ ފަރާތްތަކުން ހުށަހަޅާ ޝަކުވާތަކަށް ބަލައި ސަރުކާރުގެ އިދާރާތަކުގައިހުރި އެ މިނިސްޓްރީއަށް ޗެކްކުރެވެން ހުރި މަޢުލޫމާތުތަކަށް ރިއާޔަތްކޮށް ޝަރުތު ހަމަވާކަން ސާބިތުވާނަމަ އެ ފަރާތްތަކަށް ޙައްލު ހޯދައިދެވޭނެ ކަމަށް ވިދާޅުވިއެވެ. އެހެންކަމުން އެފަދަ ފަރާތްތަކުން ޕޯޓަލް ތެރެއިން ތަފްޞީލާއެކު ޝަކުވާ ހުށަހެޅުމަށް އެދިފައި ވެއެވެ.
ޝަރުތު ހަމަވެ ފްލެޓު ލިބޭ މީހުންނާއި ޝަރުތު ހަމަނުވާ މީހުންގެ ލިސްޓް ސަރުކާރުން އިޢުލާންކޮށްފައިވަނީ މިދިޔަމަހުގެ 27 ވަނަ ދުވަހުއެވެ. އަދި ގެދޮރުވެރިޔާ ޕޯޓަލް މެދުވެރިކޮށް މި ލިސްޓަށް ޝަކުވާ ހުށަހެޅުމުގެ ފުރުޞަތު މިމަހުގެ އެއްވަނަ ދުވަހުން31 ވަނަ ދުވަހުގެ ނިޔަލަށް ވަނީ ހުޅުވާލާފައެވެ. މިހާރު އެ މުއްދަތު މިވަނީ އަންނަ މަހުގެ 15ގެ ނިޔަލަށް އިތުރުކޮށްދެއްވާފައެވެ.