ވައިގެ މަގުން ރާއްޖެ އެތެރެކުރަން އުޅުނު 2000 އަށްވުރެ ގިނަ ވޭޕްއާ ގުޅުންހުރި ސާމާނު އަތުލައިގެންފި

ވައިގެ މަގުން ސިއްރުން ރާއްޖެއަށް އެތެރެކުރަން އުޅުނު ވޭޕްގެ 2008 އައިޓަމް ކަސްޓަމްސް އިން އަތުލައިގެންފި އެވެ.

ކަސްޓަމްސްއިން ވިދާޅުވީ މިތަކެތި އަތުލައިގެންފައިވަނީ ވެލާނާއިންޓަރނޭޝަނަލް އެއަރޕޯޓުން ކަމަށެވެ.  މި ތަކެތި އަތުލައިގަނެފައިވަނީ މި މަހުގެ 12 ވަނަ ދުވަހު ރާއްޖެއަށް އެތެރެކޮށްފައިވާ އެއަރކާގޯ ޝިޕްމެންޓެއްގައި ވޭޕް ފޮރުވާފައި ހުރިކަމަށް ޝައްކުކުރެވިގެން އިތުރަށް ބަލާފާސްކުރުމުގެ ތެރޭގައި ކަމަށްވެސް ކަސްޓަމްސްއިން ވިދާޅުވިއެވެ. 

 ކަސްޓަމްސްއިން ދަނީ މި މައްސަލަ އިތުރަށް ތަހުޤީޤްކުރަމުންނެވެ. 

ނިމިދިޔަ ހަފްތާގެ ތެރޭގައި ކަސްޓަމްސްއިން ވަނީ ގިނަ އަދަދެއްގެ ވޭޕްއާއި ގުޅުންހުރި ސާމާނު އަތުލައިގެންފަައެވެ. އެގޮތުން ވައިގެ މަގުންނާއި ކަނޑު މަގުން އެތެރެކުރަން މަސައްކަތް ކޮށްފައިވާ ތަކެތި ހިމެނެއެވެ. 

ދުންފަތް ކޮންޓްރޯލްކުރުމާ ބެހޭ ގާނޫނުގެ ދަށުން ރާއްޖެއަށް ވޭޕާއި އީ-ސިނގިރޭޓު އެތެރެކުރުމަކީ މިދިޔަ ޑިސެމްބަރު 15 އިން ފެށިގެން މަނާ ކަމެކެވެ.