4 ރަށެއްގައި ކުނި މެނޭޖްކުރާ މަރުކަޒުތައް އިމާރާތް ކުރުމުގެ މަސައްކަތް ހަވާލުކޮށްފި

4 ރަށެއްގައި ކުނި މެނޭޖްކުރާ މަރުކަޒުތައް އިމާރާތް ކުރުމުގެ މަސައްކަތް ބަޔަކާ ހަވާލުކޮށްފިއެވެ.

މިނިސްޓްރީ އޮފް ޓޫރިޒަމްއިން ވިދާޅުވީ އެ މިނިްޓްރީން ކުރިއަށްގެންދާ ގްރޭޓަރ މާލެ އެންވަޔަރަމަންޓަލް އިމްޕްރޫވްމަންޓް އެންޑް ވޭސްޓް މެނޭޖްމަންޓް ޕްރޮޖެކްޓްގެ ދަށުން ޒޯން 3 ގެ ރަށްތަކުގެ ތެރެއިން 4 ރަށެއްގައި ރަށު ފެންވަރުގައި ކުންޏާއި ވަސީލަތްތައް މެނޭޖްކުރާ މަރުކަޒުތައް ޢިމާރާތްކުރުމުގެ އެއްބަސްވުމުގައި ސޮއިކޮށްފައިވާ ކަމަށެވެ. 

އެގޮތުން އިއްޔެ ހަވާލު ކޮށްފައިވަނީ އއ. ހިމަންދޫ، އއ. ފެރިދޫ، އއ. ތޮއްޑޫ އަދި ކ. ކާށިދޫ ގައި ރަށު ފެންވަރުގައި ކުންޏާއި ވަޞީލަތްތައް މެނޭޖްކުރާ މަރުކަޒުތައް ޤާއިމުކުރުމުގެ ކޮންޓްރެކްޓްތަކެވެ. މި 4 ރަށުގެ ބިޑްތައްވެސް ކާމިޔާބުކޮށްފައިވަނީ ސަނީލޭންޑް އިންވެސްޓްމަންޓްއިން ކަމަށް އެންވަރަޔަރަމަންޓް މިނިސްޓްރީން ވިދާޅުވިއެވެ.  އެއްބަސްވުމުގައި މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓުގެ ފަރާތުން ސޮއިކުރެއްވީ ވަޒީރުތާރިޤް އިބްރާހީމެވެ.

ގްރޭޓަރ މާލެ އެންވަޔަރަމަންޓަލް އިމްޕްރޫވްމަންޓް އެންޑް ވޭސްޓް މެނޭޖްމަންޓް ޕްރޮޖެކްޓަކީ އޭޝިއަން ޑިވެލޮޕްމަންޓް ބޭންކާއި އެހެނިހެން ބޭރުގެ އެހީދޭ ފަރާތްތަކުގެ ހިލޭ އެހީއާއި ލޯނުއެހީ ހިމެނޭ ގޮތަށް އެ މިނިސްޓްރީން ހިންގާ ޕްރޮޖެކްޓެއް ކަމަށް ވިދާޅުވިއެވެ. އެއާއެކު މިޕްރޮޖެކްޓްގެ މައިގަނޑު މަޤްޞަދަކީ ޒޯން 3 (ކ. އއ. އދ. އަދި ވ.އަތޮޅު) ގެ ރަށްތަކުގައި ދެމެހެއްޓެނިވި އަދި ވަށާޖެހޭ އުސޫލަކުން ކުންޏާއި ވަސީލަތްތައް މެނޭޖްކުރުމުގެ ނިޒާމެއް ޤާއިމުކުރުން ކަމަށްވެސް އެންވަޔަރަމަންޓް މިނިސްޓްރީން ވިދާޅުވިއެވެ.