ރަމަޟާން މަހުގެ ފަހު ދިހައެއްގައި އޮފީހަށް ހާޒިރުނުވިނަމަވެސް ހާޒިރީ އެލަވަންސް ދޭން ނިންމައިފި

ރަމަޟާން މަހުގެ ފަހު ދިހައެއްގައި އޮފީހަށް ހާޒިރުނުވިނަމަވެސް ހާޒިރީ އެލަވަންސް ދޭން ނިންމައިފިއެވެ.

މި ބަދަލަކީ، ނޭޝަނަލް ޕޭ ކޮމިޝަނުން، ދައުލަތުގެ ޕޭ ފްރޭމްވަރކްގެ މިންގަނޑުތަކަށް ގެންނެވި 7 ވަނަ އިޞްލާޙުގެ ތެރޭގައި ހިމެނޭ ކަމެކެވެ. އެ އިސްލާޙުތަކާ އެއްގޮތަށް މިއަދުން ފެށިގެން ވަނީ ޢަމަލުކުރަން ފަށާފައެވެ.

ދައުލަތުގެ ޕޭ ފްރޭމްވަރކްއަށް މި ގެނައި އިސްލާހުގައި، ރަމަޟާން މަހުގެ 20 ވަނަ ދުވަހުން ފެށިގެން ރަމަޟާން މަހުގެ ނިޔަލަށް ހިމެނޭ ހުރިހާ ދުވަހަކީ، ވަޒީފާއާބެހޭ ޤާނޫނުގައި ބަޔާންކޮށްފައިވާ "ރަސްމީ ބަންދު ދުވަސް" ތައް ފަދަ ދުވަސްތަކެއްގެ ގޮތުގައި ބެލުމަށް ވަނީ ނިންމާފައެވެ.

އެގޮތުން، ރަމަޟާން މަހުގެ ފަހުދިހައަކީ ސަރުކާރު ބަންދު ދުވަސްތަކެއްކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ކަނޑައަޅުއްވާފައިވާއިރު، ރަމަޟާން މަހުގެ 20  ވަނަ ދުވަހުން ފެށިގެން ރަމަޟާން މަހުގެ ނިޔަލަށް ހިމެނޭ ދުވަސްތަކުގެ ތެރެއިން، ހުކުރު އަދި ހޮނިހިރު ދުވަސްތައް ފިޔަވައި އެހެން ދުވަސްތަކުގައި ސަރުކާރުގެ ޕޭ ފްރޭމްވަރކްގައި ހިމެނޭ އޮފީސްތަކުގެ މުވައްޒަފުންނަށް، އޮފީހަށް ހާޒިރުނުވިކަމުގައިވިޔަސް ހާޒިރީ ޢިނާޔަތް ދިނުމަށް ވަނީ ކަނޑައަޅާފައެވެ. އަދި ރަސްމީ ބަންދު ދުވަސްތަކުގައި މަސައްކަތް ކުރުމުން މުސާރައިން ދުވާލަކަށްޖެހޭ މިންވަރުގެ ދެބައިކުޅަ އެއްބަޔާ އެއްވަރުގެ ޢިނާޔަތް ދޭންވާނެކަމުގައި ވެސް ބަޔާންކޮށްފައިވެއެވެ.

މީގެ އިތުރުން، އެ ދުވަސްތަކުގައި ސަރުކާރު އޮފީސްތަކުން ރައްޔިތުންނަށް ކޮންމެހެން ދޭންޖެހޭ ޚިދުމަތްތައް ދިނުމަށްޓަކައި މަސައްކަތަށް ނިކުންނަންޖެހޭކަމަށް ކަނޑައަޅާ މުވައްޒަފުންނަށް، މަސައްކަތަށް ނިކުންނަ ހުރިހާ ދުވަހަކަށް ހާޒިރީ ޢިނާޔަތް ދިނުމަށް ވެސް ކަނޑައަޅާފައިވެއެވެ.

ހަމައެއާއެކު، ރަމަޟާން މަހުގެ މި ދުވަސްތަކުގައި އިތުރުގަޑީގެ ފައިސާ ދިނުމުގައި ހިސާބު ކުރަންވާނީ، ރަސްމީ ބަންދު ދުވަސްތަކާ އެއްގޮތަށްކަމުގައިވެސް، އެ އިސްލާހުގައި ބަޔާންކޮށްފައިވެއެވެ. އަދި އިތުރު ގަޑީގެ ފައިސާ ދިނުމުގައި މިހާރު ކަނޑައަޅާފައި އޮންނަ 10 އިންސައްތައިގެ ތެރޭގައި އެ ދުވަސްތައް ނުހިމަނައި، އެ ދުވަސްތަކުގައި އިދާރާއިން މުވައްޒަފުން ލައްވާ ކުރުވާ ހުރިހާ މަސައްކަތު ވަގުތުތަކަށް އިތުރުގަޑީގެ ފައިސާ ދެވޭނެކަމުގައި ބަޔާންކޮށްފައިވެއެވެ.

އަދި ރައީސުލްޖުމްހޫރިއްޔާގެ އޮފީހުގެ ދެންނެވުމަކުން ސަރުކާރު ބަންދު ދުވަހެއްގެ ގޮތުގައި ކަނޑައަޅާ ދުވަސްތަކަށް އިތުރުގަޑީގެ ފައިސާ ދިނުމުގައި ވެސް ހިސާބުކުރާނީ މިގޮތަށް ކަމުގައި ވަނީ ކަނޑައަޅާފައެވެ.