ޚަބަރު
ވަގުތީ ގޮތުން ހައިކޯޓުގެ ހިންގުން ފަނޑިޔާރު ފައިސަލްއާ ހަވާލުކޮށްފި
ފަނޑިޔާރު މުޙައްމަދު ފައިސަލް.
ވަގުތީ ގޮތުން ހައިކޯޓުގެ ހިންގުން ފަނޑިޔާރު މުޙައްމަދު ފައިސަލްއާ ހަވާލުކޮށްފިއެވެ.
ހައިކޯޓު ހިންގުން ވަގުތީގޮތުން ފަނޑިޔާރު ފައިސަލްއާ ޖުޑީޝަލް ސަރވިސް ކޮމިޝަނުން ހަވާލުކޮށްފައިވަނީ އެ ކޮމިޝަނުގެ ޖަލްސާއަކުން ނިންމައިގެންނެވެ.
ހައިކޯޓުގެ ފަނޑިޔާރުކަން ފައިސަލްއާ ހަވާލުކޮށްފައިވަނީ ހައިކޯޓުގެ އިސްފަނޑިޔާރުގެ މަޤާމުގައި ހުންނެވި ފަނޑިޔާރު ޙުސައިން ޝަހީދު ސުޕްރީމް ކޯޓަށް އައްޔަން ކުރެއްވުމާއި ގުޅިގެންނެވެ.
ޝަހީދު ސުޕްރީމް ކޯޓުގެ އިސްފަނޑިޔާރަކަށް އައްޔަނުކުރަން ފެންނަކަމަށް ރައްޔިތުންގެ މަޖިލީހުން ރުހުން ދިނީ އިއްޔެ ބޭއްވި ޖަލްސާއެއްގައެވެ.
ޝަހީދު މި މަޤާމަށް އައްޔަނުކުރަން ފެންނަކަމަށް ވޯޓުގައި ބައިވެރިވެވަޑައިގަތް 64 މެންބަރުން ވަނީ އިއްތިފާޤްވެލައްވައިފައެވެ.
މަޖިލީހުން ރުހުން ދިނުމާއިއެކު ރައީސް ޑރ މުޙައްމަދު މުއިއްޒު ވަނީ ޝަހީދު އެ ކޯޓުގެ ފަނޑިޔާރު ކަމަށް އައްޔަން ކުރައްވާފައެވެ.
އޭނާ ވަނީ ހައި ކޯޓުގެ އިސް ފަނޑިޔާރުގެ މަޤާމާއި ކްރިމިނަލް ކޯޓުގެ ފަނޑިޔާރުކަމުގެ މަޤާމުވެސް ފުރުއްވާފައެވެ.
ހައިކޯޓުގެ ހިންގުން ފަނޑިޔާރު ފައިސަލްއާ ހަވާލުކުރެއްވުމާއެކު، އެ ކޯޓުގެ ފަނޑިޔާރުންގެ ބެންޗުގެ އެއް މަޤާމު މިހާރު ވަނީ ހުސްވެފައެވެ.
