Ads by Exprox

ޚަބަރު

55 ކައުންސިލްގެ މަސައްކަތްތައް ކުރިއަށް އޮތް ދެ އަހަރާއި ބައިގެ ތެރޭގައި ނިމޭނެ- ވަޒީރު އާދަމް ޝަރީފް

55 ކައުންސިލްގެ މަސައްކަތްތައް ކުރިއަށް އޮތް ދެ އަހަރާއި ބައިގެ ތެރޭގައި ނިމޭނެ- ވަޒީރު އާދަމް ޝަރީފް

ވަޒީރު އާދަމް ޝަރީފް ޢުމަރު

މިންނާ ޢަބްދުލްޙަކީމް

މިންނާ ޢަބްދުލްޙަކީމް

20 މާރިޗު 2025، 01:49

20 މާރިޗު 2025، 01:49

ކޮންޓްރެކްޓަރ ފައިނޭންސް އުޞޫލުން އެޅުމަށް ހަމަޖެހިފައިވާ، 55 ކައުންސިލް އިދާރާގެ މަސައްކަތްތައް ކުރިއަށް އޮތް ދެ އަހަރާއި ބައިގެ ތެރޭގައި ނިމޭނެ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ. 

ވަޒީރު މިހެން ވިދާޅުވީ އެ ވުޒާރާގެ ރެކްރިއޭޝަން ކުލަބުން އިންތިޒާމުކޮށްގެން ޕަބްލިކް ވާރކްސް ޑިޕާޓްމެންޓުގައި ރޭ ބޭއްވި ޚާއްޞަ ތަރާވީޙުގައި ވާހަކަފުޅުދައްކަވަމުންނެވެ.

ވަޒީރު ވިދާޅުވީ ކޮންޓްރެކްޓަރ ފައިނޭންސް އުޞޫލުން އެޅުމަށް ހަމަޖެހިފައިވާ، 55 ކައުންސިލް އިދާރާގެ ތެރެއިން މިހާރު ބިންގާ އެޅިފައިވާ 13 ތަނުގެ ސިވިލް ވާރކް މަސައްކަތްތައް ފެށުމާ ގުޅޭ ގޮތުން ބަދަލުކުރަންޖެހޭ ލިޔުންތައް އެ ފަރާތްތަކަށް މިހާރު ފޮނުވަން ފަށައިފައިވާ ކަމަށެވެ. އަދި އެ ތަންތަނުގެ މަސައްކަތް ކުރާނެ ފަރާތެއް ކައުންސިލްތައް މެދުވެރިކޮށް ހޯދުމަށް ފަހު، ޢަމަލީ މަސައްކަތް ވަރަށް އަވަހަށް ފެށޭނެ ކަމަށާއި އަދި މި 55 ކައުންސިލްގެ މަސައްކަތްތައް ކުރިއަށް އޮތް ދެ އަހަރާއި ބައިގެ ތެރޭގައި ނިމޭނެ ކަމަށްވެސް ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ 55 ކައުންސިލް މަޝްރޫޢުގެ މަސައްކަތް ކައުންސިލްތައް މެދުވެރިކޮށް އެ ރަށަކުން ބަޔަކު ހޯދާ، މަސައްކަތްކުރުމުގެ ޙަޤީޤީ ބޭނުމަކީީ، އެ ކަންކަމުގައި ކައުންސިލްތަކުގެ ބައިވެރިވުން އިތުރުކޮށް، އެ ރަށެއްގެ ރައްޔިތުންނަށް އިޤްތިޞާދީ މަންފާ ހޯދައިދިނުމަށް ކަމަށެވެ. އަދި އެ މަސައްކަތްކުރެވޭ އިރު ރަށު ފެންވަރުގައި އެކުލަވައިލެވިފައި އޮންނަ މޮނިޓަރެއް ކޮމިޓީއެއް ވެސް އެ ރަށްރަށުގައި އޮންނާނެ ކަމަށް މިނިސްޓަރ ވިދާޅުވިއެވެ.

ވަޒީރުގެ ވާހަކަފުޅުގައި ހއ، ހދ އަދި ށ. އަތޮޅުގައި ހެދިފައިވާ ފެރީ ޓާމިނަލްތަކާއި، ސްޕޮޓްތައް ކައުންސިލްތަކާ ޙަވާލުކުރުމަށް ކުރަމުންދާ މަސައްކަތުގެ ތަފްޞީލް ވެސް ދެއްވިއެވެ. ވަޒީރު ވިދާޅުވީ އެ ތަންތަން ޙަވާލުކުރުމަށް މިނިސްޓްރީއާ، ކައުންސިލްތަކާ ދެމެދު ވެވޭ ފަހުމުނާމާތައް މިހާރު ފޮނުވިފައިވާ ކަމަށެވެ. އެ ފަހުމުނާމާތަކުގައި ސޮއިކުރެވި އަދި އެ ތަންތަނުގައި ކުރަން ހުރި މަރާމާތުތައް ނިމުމުން، އެ ތަންތަނުގެ ޚިދުމަތް ރައްޔިތުންނަށް ކައުންސިލްތައް މެދުވެރިކޮށް ލިބިގެންދާނެ ކަމަށެވެ. މީގެ އިތުރުން ފެރީ ޓާމިނަލް ނޭޅި ހުރި ދިހަވަރަކަށް ރަށުގެ ފެރީ ޓާމިނަލް އެޅުމުގެ މަސައްކަތް އެމްޓީސީސީއާ ވާހަކަދައިގެން ކުރިއަށް ގެންދާނެ ކަމަށް ވެސް، ވަޒީރު އާދަމް ޝަރީފު ޢުމަރު ވިދާޅުވިއެވެ.

މި ލިޔުން ކިޔާލުމުން

Ads by MSS