ޚަބަރު
ހައިކޯޓުގެ އިސް ފަނޑިޔާރާއި، ފަނޑިޔާރު ކަމަށް ކުރިމަތިލުމުގެ ފުރުސަތު ހުޅުވާލައިފި

ދިވެހި ރާއްޖޭގެ ހައިކޯޓު- ފޮޓޯ؛ ދި މޯލްޑިވްސް ޖަރނަލް
އިކޯޓުގެ އިސް ފަނޑިޔާރާއި، ފަނޑިޔާރު ކަމަށް ކުރިމަތިލުމުގެ ފުރުސަތު ހުޅުވާލައިފިއެވެ.
ހައި ކޯޓަށް އިސް ފަނޑިޔާރު ހޮވަނީ، އެ ކޯޓުގައި ތިއްބަވާ ފަނޑިޔާރުންގެ ތެރެއިންނެވެ. މި މަޤާމަށް ކުރިމަތިލެވޭނީ މިހާރުވެސް ހައިކޯޓުގައި މަސައްކަތްކުރައްވަމުން ގެންދަވާ ފަނޑިޔާރުންނަށް އެކަނި ކަމަށް ޖޭއެސްސީން މިއަދު ނެރުނު ބަޔާނުގައި ބުނެފައި ވެއެވެ.
އިސް ފަނޑިޔާރުގެ މަގާމަށް ކުރިމަތިލުމުގެ ފުރުސަތު ޖޭއެސްސީން ހުޅުވައިލީ މި މަހުގެ 29 ވަނަ ދުވަހުގެ މެންދުރު12:00 އާ ހަމައަށެވެ. އަދި ހައި ކޯޓުގެ ފަނޑިޔާރުގެ މަގާމަށް ހުށަހެޅުމުގެ ސުންގަޑިއަކީ އަންނަ މަހުގެ 10ވަނަ ދުވަހުގެ ހެނދުނު 10:00ގެ ކުރި އެވެ.
ހައި ކޯޓުގެ އިސް ފަނޑިޔާރުގެ އަސާސީ މުސާރައަކީ މަހަކު 47،000ރ. އެވެ. އޭގެ އިތުރުން ލިވިން އެލަވަންސަށް މަހަކު 18،000ރ. އަދި ރިސްކު އެލަވަންސްގެ ގޮތުގައި މަހަކު 3،300ރ. ލިބިވަޑައިގަންނަވާނެ އެވެ. މުސާރަ އާއި ފައިސާގެ އިނާޔަތުގެ އިތުރުން ރައްޔިތުންގެ މަޖިލިހުން ކަނޑައަޅާފައިވާ ގޮތުގެ މަތިން ހެލްތު އިންޝުއަރެންސާއި ފޯނު އެލަވަންސް ދޭނެ އެވެ. ހައި ކޯޓުގެ ފަނޑިޔާރެއްގެ އަސާސީ މުސާރައަކީ މަހަކު 45،700ރ. އެވެ. އޭގެ އިތުރުން ލިވިން އެލަވަންސަށް މަހަކު 18،000ރ. އާއި ރިސްކު އެލަވަންސަށް މަހަކު 3،3000ރ. ލިބިވަޑައިގަންނަވާނެ އެވެ. ދެން ލިބިވަޑައިގަންނަވާނީ ރައްޔިތުންގެ މަޖިލިހުން ކަނޑައަޅާ ގޮތެއްގެ މަތިން ހެލްތު އިންޝުއަރެންސާއި ފޯނު އެލަވަންސެވެ.
ހައި ކޯޓުގެ އިސް ފަނޑިޔާރުގެ މަގާމު ހުސްވީ މިހާތަނަށް އެ މަގާމުގައި ހުންނެވި ހުސައިން ޝަހީދު ސުޕްރީމް ކޯޓުގެ ފަނޑިޔާރުކަމަށް އައްޔަން ކުރުމުންނެވެ. މީގެ އިތުރުން ހައި ކޯޓު ހިންގުން ވަގުތީ ގޮތުން މިއަދުން ފެށިގެން ފަނޑިޔާރު މުހައްމަދު ފައިސަލްއާ ވަނީ ހަވާލުކޮށްފައެވެ.