ކޮންޓްރޯލަރ ޖެނެރަލްގެ މަޤާމުން ޝަމްޢާން ވަކިކޮށްފި

މޯލްޑިވްސް އިމިގްރޭޝަންގެ ކޮންޓްރޯލަރ ޖެނެރަލްގެ މަޤާމުން މުޙައްމަދު ޝަމްޢާން ވަޙީދު ވަކިކޮށްފިއެވެ.

ޝަމްޢާމް މި މަޤާމުން ވަކިކުރިކަން މިހާރު ކަށަވަރުވެފައިވީ ނަމަވެސް، ސަރުކާރުން އަދި ރަސްމީކޮށް މިކަން ހާމަކޮށްފައެއް ނުވެއެވެ. 

ކޮންޓްރޯލަރގެ މަޤާމަށް ޝަމްޢާން އައްޔަންކުރީ 19 ނޮވެންބަރު 2023 ގައެވެ. އަދި އޭނާ އިއްޔެ މަޤާމުން ވަކިކޮށްފައިވާއިރު، މި ކަމުގެ ސަބަބެއް އަދި ސާފެއް ނުވެއެވެ.

ޝަމްޢާންއަކީ އިމިގްރޭޝަންގެ އޮފިސަރެއްގެ ގޮތުގައި ވެސް 14 އަހަރު މަސައްކަތްކުރެއްވި ބޭފުޅެކެވެ.