މަސައްކަތް ހަރުދަނާކަމާއެކު އަވަސް ކުރުމަކީ ރައީސްގެ އިރުޝާދު- ވަޒީރު ތާރިޤު

ކ. ތިލަފުށީގައި ޤާއިމްކުރާ ކުނިން ހަކަތަ އުފާދާ ޕްލާންޓްގެ މަސައްކަތް  ހަރުދަނާކަމާއެކު އަވަސް ކުރުމަކީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ އިރުޝާދު ކަމަށް ފަތުރުވެރިކަމާއި ތިމާވެއްޓާ ބެހޭ ވަޒީރު ވަޒީރު ޠާރިޤު އިބްރާހީމް ވިދާޅުވެއްޖެއެވެ.

ގްރޭޓަރ މާލޭ އެންވަޔަރަމަންޓް އިމްޕްރޫވްމަންޓް އެންޑް ވޭސްޓް މެނޭޖްމަންޓް މަޝްރޫޢުގެ މަސައްކަތްތައް ބައްލަވާލެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ތިލަފުއްޓަށް ކުރެއްވި ޒިޔާރަތުގެ ތެރެއިން ނޫސްވެރިންނަށް މަޢުލޫމާތު ދެއްވަމުން ވަޒީރު ވިދާޅުވީ  މަސައްކަތް ވީހާވެސް ހަރުދަނާކަމާއެކީ އަވަހަށް ކުރުމަށް ރައީސް އިރުޝާދު ދެއްވާފައިވާ ކަމަށެވެ. ވަޒީރު އިތުރަށް ވިދާޅުވީ ކުރިން މި މަސައްކަތް ކުރިއަށް ގޮސްފައިވަނީ މަޑު ދުވެއްޔެއްގައި ކަމަށާއި ރައީސް ޑރ މުޢިއްޒު ހަވާލުވެވަޑައިގަތުމާއެކު ސްޕީޑް އަވަސްވެފައިވާ ކަމަށެވެ. 

ހަމައެއާއެކު ތިލަފުށި މީގެ ކުރިން އޮތް ހާލަތާ މިހާރުގެ ހާލަތު ވަރަށް ބޮޑަށް ތަފާތުކަން ވަޒީރު ފާހަގަ ކުރެއްވިއެވެ. ކުރިން މެއްސާއި ކުނީގެ ސަބަބުން ރަށަށް އެރުމަކީވެސް ތަކުލީފެއް ކަމަށާއި މިހާރު އެމައްސަލަވެސް ހައްލުވެފައިވާކަމަށް ވަޒީރު ވިދާޅުވިއެވެ. ވަޒީރު ވިދާޅުވީ ތިލަފުށި ބަލަހައްޓާ، ކުނި މެނޭޖް ކުރުމުގެ މަސައްކަތްތައް ކުރިއަށްދަނީ ވަރަށް ރަނގަޅަށް ކަމަށެވެ. 

މީގެ އިތުރުން ތިލަފުށީގައި ޤާއިމް ކުރާ ކުނިން ހަކަތަ އުފައްދާ ނިޒާމުން ދުވާލަކު 500 ޓަނުގެ ކުނި އެންދޭނެކަމަށާއި،  އަންދާ ކުނިން 13 މެގަރ ވޮޓްގެ ހަކަތަ އުފެއްދޭނެކަމަށްވެސް ވަޒީރު ވިދާޅުވިއެވެ. އޭގެ ތެރެއިން 10 މެގަރ ވޮޓް މާލެ ސަރަހައްދުގެ ގްރިޑަށް އިތުރުކުރެވި ބާކީ 3 މެގަރ ވޮޓް ބޭނުން ކުރާނީ ތިލަފުށީގައިކަމަށް ވަޒީރު ވިދާޅުވިއެވެ. މި މަޝްރޫއު ނިންމޭނެކަމަށް ލަފާކުރެވެނީ އަންނަ އަހަރުގެ ފަހުކޮޅުކަމަށް ވަޒީރު ވިދާޅުވިއެވެ.