އެއްވެސް ދަތިކަމަކާ ނުލާ މާލޭ ސަރަޙައްދުގެ ކުނި މެނޭޖް ކުރެވޭނެ އިންތިޒާމުތައް މިހާރު ތިލަފުށީގައި އެބަހުރި- މުޖުތަބާ

އެއްވެސް ދަތިކަމަކާ ނުލާ މާލޭ ސަރަޙައްދުގެ ކުނި މެނޭޖް ކުރެވޭނެ އިންތިޒާމުތައް މިހާރު ތިލަފުށީގައި އެބަހުރި ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ)ގެ މެނޭޖިންގ ޑައިރެކްޓަރ  މުޖުތަބާ ޖަލީލް ވިދާޅުވެއްޖެއެވެ.

ގްރޭޓަރ މާލޭ އެންވަޔަރަމަންޓް އިމްޕްރޫވްމަންޓް އެންޑް ވޭސްޓް މެނޭޖްމަންޓް މަޝްރޫޢުގެ މަސައްކަތްތައް ބައްލަވާލެއްވުމަށް ތިލަފުއްޓަށް ކުރެއްވި ޒިޔާރަތުގެ ތެރެއިން ނޫސްވެރިންނާ ބައްދަލުކުރައްވާ ވާހަކަފުޅުދައްކަވަމުން  މުޖުތަބާ ވިދާޅުވީ ގްރޭޓަރ މާލޭ ސަރަހައްދުގެ އިތުރުން ނޮދަން އޭރިއާ ސަރަހައްދުތަކުންވެސް ކުނި ގެންނަނީ ތިލަފުއްޓަށްކަމަށެވެ. އަދި ތިލަފުއްޓަށް ކުނި އަޅަން ކަނޑައަޅައިފައިވަނީ ކުޑަ ސަރަހައްދެއްގައިކަމަށްވާއިރު މި ސަރަހައްދުގައި އެކަށީގެންވާ ގޮތަށް ކުނި މެނޭޖްނުކުރެވިއްޖެނަމަ ގިނަ އުނދަގޫތަކާ ކުރިމަތިލާންޖެހޭކަމަށެވެ.

އެގޮތުން ތިލަފުއްޓަށް 1000 ޓަނުގެ ކުނި ކޮންމެ ދުވަހަކުވެސް ގެންނާނެކަމަށް މީގެ ކުރިން ލަފާކުރެވުނުނަމަވެސް، އެ އަދަދު ވަރަށް ބޮޑުތަނުން މައްޗައް ގޮސްފައިވާކަމަށް މުޖުތަބާ ވިދާޅުވިއެވެ. ކަން މިހެން ހުރުމާއެކު ކޮންމެ ދުވަހަކުވެސް ގެންނަ ކުނި އެދުވަހެއްގައި ހުސްކުރަމުންދާ ކަމަށާއި 8 ގަޑި އިރުގެ މަސައްކަތް މިހާރު 24 ގަޑިއިރަށް ބަދަލު ކުރެވިފައިވާކަން ފާހަގަ ކުރެއްވިއެެވެ. 

މުޖުތަބާ އިތުރަށް ވިދާޅުވީ މިހާރު ތިލަފުށީގައި ކުރިއަށް އޮތް 3 އަހަރުގެ ކުނި  މެނޭޖްކުރުމަށް ފުރުސަތު ހޯދާ ޖާގަ  ހެދިފައިވާކަމަށެވެ. މަސަައްކަތުގެ ތެރެއިން ކުޑަ އެރޯއެއް އެރި ނަމަވެސް  އެއްވެސް ދަތިކަމަކާ ނުލާ މުޅި މި ގްރޭޓާ މާލޭ ރީޖަންގެ ކުނި މެނޭޖްކުރުމުގެ ކަންކަން  ކުރިއަށްގެންދިއުމުގެ ޖާގަ ހެދިފައިވާކަމަށްވެސް މުޖްތަބާ ޖަލީލް ވިދާޅުވިއެވެ.

މުޖުތަބާ ވިދާޅުވީ ގިނަ މަރުހަލާތަކެއް ކަޑައްތުކޮށް ތިލަފުށި ސާފުކޮށް، ކުނި ގިނަވިޔަ ނުދީ ހިފެހެއްޓިފައިވަނީ ރައީސްގެ އިރުޝާދުގެ ދަށުން އެންވަޔަރަަމަންޓް މިނިސްޓްރީއާއި ގުޅިގެން ކުރެވުނު ބުރަ މަސައްކަތުން ކަމުގައެވެ. އެއާއެކު ވަސީލަތްތައް މަދު ނަމަވެސް ރައްޔިތުންނަށް ދޭންވާން ޚިދުމަތްތައް އެންމެ ފުރިހަަމައަށް ދިނުމުގެ މަސައްކަތް ކުރައްވާ ކަމަށްވެސް އެމްޑީ ވިދާޅުވިއެވެ.