ރާއްޖޭގައި "އާތު އަވަރ 2025" ފާހަގަ ކުރުން މާދަމާރޭ

މިއަހަރުގެ އާތު އަވަރ "އާތު އަވަރ 2025" ފާހަގަ ކުރުން މާދަމާރޭ އޮންނާނެ ކަމަށް އެންވަޔަރަމަންޓް މިނިސްޓްރީން ވިދާޅުވެއްޖެއެވެ. 

މިނިސްޓްރީން ވިދާޅުވީ ދުނިޔޭގެ ފެންވަރުގައި ފާހަގަކުރުމަށް ހަމަޖެހިފައިވާ "އާތު އަވަރ 2025" މި ޙަރަކާތުގައި ރާއްޖޭ ރައްޔިތުންނާއި، ދިރިއުޅޭ ފަރާތްތަކުންނާއި، ވިޔަފާރި ކުންފުނިތަކާއި، އެކިއެކި މަދަނީ ޖަމިއްޔާތަކުން ބައިވެރިވުމަކީ އެ މިނިސްޓްރީގެ ވަރަށް ބޮޑު އެދުމެއް ކަމަށެވެ.

މި ޙަރަކާތް ކުރިއަށް ގެންދިއުމަށް ހަމަޖެހިފައިވަނީ މާދަމާ ރޭ (22 މާރިޗު 2025)  21:45 އިން 22:45 އަށެވެ. މި ވަގުތުގައި ކޮންމެހެން ބޭނުންކުރަންޖެހޭ ތަކެތި ފިޔަވައި އެހެން ހުރިހާ ތަކެތި ނިއްވާލަން މިނިސްޓްރީން އެދިފައި ވެއެވެ. 

"އާތު އަވަރ" އަކީ ދުނިޔެ ހޫނުވުމާއި ތިމާވެއްޓަށް އަންނަމުންދާ ބަދަލުތަކާއިމެދު މީހުންގެ މެދުގައި ހޭލުންތެރިކަން އިތުރުކުރުމުގެ ގޮތުން ބައިނަލްއަޤުވާމީ ފެންވަރުގައި ކުރިއަށް ގެންދާ ޚާއްޞަ ޙަރަކާތެކެވެ.

އާތު އަވަރ ފާހަގަކުރުމަށް ކުރިއަށްގެންދާ ޙަރަކާތް ތަކަކީ، ކަރަންޓް ބޭނުންކޮށްގެން ދިއްލާ، ދިއްލުންތައް އެއްގަޑިއިރަށް ނިއްވުމެވެ. މިކަން ކޮންމެ ޤައުމެއްގައިވެސް ކަނޑައެޅިފައިވާ ގަޑިއެއްގައި ފަށައިގެން އެއްގަޑިއިރަށް ކުރިއަށް ދާނެއެވެ. މިކަމުގެ ބޭނުމަކީ، ކަރަންޓް ބޭނުންކުރެވޭ މިންވަރު ދަށްކޮށް، އެކަމަށްޓަކައި އަންދާ ތެލުގެ މިންވަރުވެސް މަދުކުރުމެވެ.