ޕީއެންސީ އެތެރޭގެ އިންތިޚާބު ނޮވެމްބަރަަށް ފަސްކޮށްފި

ވެރިކަން ކުރާ މައި ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ)ގެ އެތެރޭގެ އިންތިޚާބު އަންނަ ނޮވެންބަރު މަހަށް ފަސްކޮށްފިއެވެ.

މި އިންތިޚާބު ބޭއްވުމަށް އެ ޕާޓީން ކުރިން ނިންމާފައި އޮތީ އޮކްޓޫބަރު މަހުގެ 19 ވަނަ ދުވަހެެވެ. އެ ޕާޓީން މިއަދު ބުނީ، އެ އިންތިޚާބު ނޮވެންބަރު 9 އަށް މިހާރު ފަސްކުރެވިފައިވާކަމަށެވެ. އެގޮތުން ރާއްޖޭގެ އެކި ކަންކޮޅުތަކުން ޖުމްލަ 2،095 މެންބަރުން މި އިންތިހާބުގައި ޕާޓީގެ އެކިއެކި މަޤާމުތަކަށް އައްޔަން ކުރާނެއެވެ.

އިންތިޚާބު ބާއްވާ ތާރީޚަށް ގެނައި ބަދަލާއެކު އިންތިޚާބަށް ކުރިމަތިލުމުގެ މުއްދަތުވެސް ވަނީ އިތުރުކޮށްފައެވެ. މިގޮތުން އިންތިޚާބަށް ކުރިމަތިލުމުގެ އެންމެ ފަހު ދުވަހަކީ އަންނަ އޮކްޓޫބަރު މަހުގެ 24 އެވެ.

ޕީއެންސީގެ އެތެރޭގެ އިންތިޚާބުގައި ދާއިރާ ރައީސް އަދި ނައިބު ރައީސް އާއި ޒުވާނުންގެ ހަރާކާތުގެ ރަށު ރައީސް އަދި އަންހެނުންގެ ހަރަކާތުގެ ރަށު ރައީސް ގެ އިތުރުން ސްޓިއަރިން ކޮމިޓީގެ މެމްބަރުން އިންތިޚާބުކުރާނެއެވެ.