އެއްބަސްވުުމުުގައި ސޮއިކުރެވުނުތާ ދެމަސްދުވަސްތެރޭ އޭޓީއެމްގެ ޚިދުމަތް މުރައިދުއަށް

ބޭންކް އޮފް މޯލްޑިވްސް، ބީއެމްއެލްގެ އޭޓީއެމް ޚިދުމަތް ދިނުމުގެ އެއްބަސްވުމުގައި ސޮއި ކުރެވުނުތާ 2 މަސްދުވަހުގެ ތެރޭގައި ހއ. މުރައިދޫގައި ޚިދުމަތް ދޭން ފަށައިފިއެވެ.

މުރައިދޫގައި މި ޚިދުމަތް ފައްޓަވައިދެއްވީ މިއަދު އެ ރަށުގައި ބޭއްވި ރަސްމިއްޔާތެގައި ފަތުރުވެރިކަމާއި ތިމާވެށްޓާއިި ބެހޭ ވަޒީރު ޠާރިގް އިބްރާހީމެވެ. މުރައިދޫގައި ބޭންކް އޮފް މޯލްޑިވްސް، ބީއެމްއެލްގެ އޭޓީއެމް ޚިދުމަތް ފަށްޓަވައިދެއްވުމުގެ ގޮތުން ވަޒީރު ވަނީ އޭޓީއެމުން ފައިސާ ނަންނަގަވާފައެވެ. އަދި ފައިސާ ނެންގެވި ކާޑު ވަނީކައުންސިލާ ޙަވާލުކުރައްވާފައެވެ.

އޭޓީއެމްގެ ޚިދުމަތް ރަށުން ލިބޭނެގޮތް ހަމަޖެހިގެން ދިއުމަކީ އެރަށު ރައްޔިތުން އުފަލާއެކު ފާހަގަ ކުރާ ކަމެކެވެ. އެރަށުން ވާހަކަ ދެއްކި މީހަކު ވިދާޅުވީ މީގެ ކުރިން 1000 ރުފިޔާ ނަގަން 500-600 ރުފިޔާ ޚަރަދުކޮށްގެން އެހެން ރަށަކަށް ދާން ޖެހޭ ކަމަށެވެ. އޭޓިއެމްގެ ޚިދުމަތާއެކު އެތައް ބައެއްގެ ވަގުތާއި ފައިސާ ސަލާމަތްވާނެކަމަށް ރައްޔިތަކު ފާހަގަ ކުރިއެވެ.

ހއ. މުރައިދޫގައި ބޭންކް އޮފް މޯލްޑިވްސް، ބީއެމްއެލްގެ އޭޓީއެމް ބެހެއްޓުމުގެ އެއްބަސްވުމުގައި ސޮއިކުރައްވާފައިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެރަށަށް ޖަނަވަރީ މަހުގެ ތެރޭގައި ކުރެއްވި ދަތުރުފުޅުގައެވެ.