ޒުވާނުންނާއި ކައުންސިލުން އެދުނު ގޮތަށް މިލަދޫގެ ބޮޑު ފުޓްބޯޅަ ދަނޑު ނިންމައިފި

ށ. މިލަދޫގެ ޒުވާނުންނާއި ކައުންސިލުން އެދުނު ގޮތަށް އެ ރަށުގެ ބޮޑު ފުޓްބޯޅަ ދަނޑު ނިންމައިފިއެވެ.

ކުޅިވަރާއި ހަށިހެޔޮކަމާ ބެހޭ ވުޒާރާއިން ވިދާޅުވީ އެކި ސަބަބުތަކާހުރެ އެ މަސައްކަތް ނުނިންމި އޮންނަތާ ހަތް އަހަރު ފަހުން، ދަނޑުގެ މަސައްކަތް ރަށު ކައުންސިލާއި ޒުވާނުން އެދޭގޮތަށް ފުރިހަމަކޮށްފައިވާކަމަށެވެ.

މިލަދޫ ފުޓްބޯޅަ ދަނޑަކީ 2017ވަނަ އަހަރު މަސައްކަތް ފެށި ދަނޑެކެވެ. ދަނޑުގެ މަސައްކަތް ނުނިންމި ގިނަ ދުވަސްތަކެއް ވީނަމަވެސް ދަނޑުގެ މަސައްކަތް ފުރިހަމަކޮށްފައިވަނީ މި ސަރުކާރުންނެވެ. މި ސަރުކާރުން ދަނޑުގެ މަސައްކަތް ނިންމާފައި މިވަނީ އަހަރެއްހާ ދުވަހުގެ ތެރޭގައެވެ.

އެގޮތުން ދަނޑުގެ ސަބް-ބޭސް ރަނގަޅުކޮށް ދަނޑުގައި ޓާފް އަޅާފައިވާކަމަށާއި، ވަށާ ފާރާއި، ފެންސްވެސް މަރާމާތުކޮށްފައިވާ ކަމަށް ކުޅިވަރު ވުޒާރާއިން ވިދާޅުވެއެވެ. ކުރިން ތިން ފޫޓަށް ރާނާފައިވާ ވަށާ ފާރު މިހާރު ހަ ފޫޓަށް އުސްކޮށް، އަދި 9 ފޫޓަށް ހުރި ފެންސް މިހާރު ވަނީ 15 ފޫޓަށް އުސްކޮށްފައެވެ.

މިލަދޫ ދަނޑުގެ މަސައްކަތް ޒަމާނީ ފެންވަރަށް ތަރައްގީކުރެވިފައިވާއިރު، އެ ދަނޑުގެ ލައިޓް ހަރުކުރުމުގެ މަސައްކަތްވެސް މި ދައުރުގައި ކުރުމަކީ ސަރުކާރުގެ އަމާޒެއްކަމަށް އެ ވުޒާރާއިން ވިދާޅުވެއެވެ. 

ށ. އަތޮޅުގެ މިލަދޫގެ އިތުރުން ސަރުކާރުން ވަނީ ށ. ފުނަދޫގައިވެސް ފުޓްބޯޅަ ދަނޑެއް އަޅާފައެވެ. މި މަސައްކަތް ނިންމައި އެ ރަށުގެ ޒުވާނުން އަންނަނީ އެ ދަނޑު ބޭނުންކުރަމުންނެވެ.