ކުޅުދުއްފުށީގައި ބައިނަލްއަޤްވާމީ ހޭންޑްބޯލް މުބާރާތެއް ބާއްވަނީ

މި އަހަރުގެ ސެޕްޓެންބަރު މަހު ހދ. ކުޅުދުއްފުށީގައި ބައިނަލްއަޤްވާމީ ހޭންޑްބޯލް މުބާރާތެއް ބޭއްވުމުގެ މަސައްކަތް ކުރަމުން އަންނަ ކަމަށް ހޭންޑްބޯލް މޯލްޑިވްސްގެ ރައީސް އަޙްމަދު މުޖުތަބާ (މުޖޭ) ވިދާޅުވެއްޖެއެވެ. 

މުޖޭ ވިދާޅުވީ، މި މުބާރާތް ބެއްވުމަށް މަސައްކަތްކުރަނީ ކޮމަންވެލްތާ ގުޅިގެން ކަމަށާއި، އަދި މިއީ ރާއްޖޭގައި ބާއްވާނެ ފުރަތަމަ ބައިނަލްއަޤްވާމީ ހޭންޑްބޯލް މުބާރާތްކަމަށެވެ. އަދި މިކަން ކޮމަންވެލްތަށް ހުށަހެޅުމުން، އެ ބޭފުޅުން މިކަމަށް އެއްބަސްވެފައިވާކަމަށް ވެސް މުޖޭ ވަނީ ވިދާޅުވެފައެވެ.

މި މުބާރާތަށް ތައްޔާރުވުމުގެ ގޮތުން ކުޅުދުއްފުށީގައި ހޭންޑް ބޯޅަ ކުޅޭ އިތުރު ދެ ކޯޓެއް ތަރައްޤީކުރަން ޖެހެއެވެ. އަދި މިކަމަށް އެ ސިޓީގެ ކައުންސިލުން ފުރިހަމަ އެއްބާރުލުން ލިބޭކަމަށް މުޖޭ ވަނީ ފާހަގަކޮށްފައެވެ.

މި މުބާރާތް ބާއްވަން ހަމަޖެހިފައިވަނީ ކޮމަންވެލްތުގެ ޤައުމުތަކުގެ މެދުގައެވެ. އަދި މުބާރާތުގައި ގިނަވެގެން ބައިވެރިކުރަން ވިސްނަނީ 12 ޓީމެވެ.

މިއީ ކޮމަންވެލްތްގެ ގައުމުތަކުގެ މެދުގައި ބާއްވާ މުބާރާތެއް. އެހެންނަމަވެސް އަޅުގަނޑުމެން މުބާރާތް ރާވާފައި މިއޮތީ އެހާ ގިނަ ގައުމުތަކެއް އެއް ފަހަރާ ބައިވެރިކުރާގޮތަކަށް ނޫން. އަޅުގަނޑުމެންގެ ވިސްނުން އޮތީ ގިނަވެގެން 12 ވަރަކަށް ޓީމު މަދުވެގެން 6 ޓީމުގެ މެދުގައި މި މުބާރާތް ބާއްވަން.

ހޭންޑްބޯލް މޯލްޑިވްސްގެ ރައީސް އަޙްމަދު މުޖުތަބާ ވިދާޅުވިއެވެ.

މުޖޭ އިތުރަށް ވިދާޅުވީ، ކުޅުދުއްފުށީގައި މުބާރާތް ބޭއްވުމަށް ނިންމި އެއް ސަބަބަކީ، ކޮމަންވެލްތުގެ މިންގަނޑުތަކުގެ ތެރެއިން އެ ސިޓީގައި އެކަން ކުރުމުގެ ފުރުސަތު އޮތުމެވެ. އެގޮތުން އެ މިންގަނޑުތަކުގެ ތެރޭގައި ބޮލަކަށް 40 ޑޮލަރުން ހުރުމާއި ކެއުން ހަމަޖެހެން ހިމެނެއެވެ. ނަމަވެސް މާލޭ ސަރަޙައްދުގެ ރަށްތަކުގައި ހުރުމުގެ ޚަރަދު ބޮޑުކަމުން، މިކަން ކުރުމަށް އެންމެ ރަގަޅު ތަނަކަށް ފެނުނީ ކުޅުދުއްފުށި ސިޓީ ކަމުގައި މުޖޭ ވަނީ ފާހަގަކޮށްފައެވެ.

ރާއްޖޭގެ ބީޗް ހޭންޑްބޯޅަ ޓީމުން އޭޝިއަން ޗެމްޕިއަންޝިޕަށް ތައްޔާރުވުމަށް ފަރިތަކުރުންތައް ބާއްވަމުން އަންނަނީ ވެސް ކުޅުދުއްފުށީގައި އަންނަނީ ބާއްވަމުންނެވެ. މިއީ މޭ މަހުގެ 5 ން 10 އަށް އޮމާންގައި ބާއްވާ މުބާރާތެކެވެ.

ބީޗް ހޭންޑްބޯޅަ ކޯޓުތައް ހިމެނޭ ސަރަހައްދުގައި ގާއިމުކުރަންޖެހޭ ޗޭންޖިން ރޫމާއި އެހެނިހެން ކަންކަންވެސް ކުޅުދުއްފުށީ ސިޓީ ކައުންސިލުން އަންނަނީ ހަމަޖައްސައިދެމުންނެވެ.