ޚަބަރު
ރާއްޖެ ޓީވީ އާއި މެދު ފިޔަވަޅު އަޅައިދިނުމަށް އެދި ބްރޮޑްކާސްޓިންގ ކޮމިޝަނަށް ހުށަހަޅައިފި

އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު
އޯޓިޒަމް އަދި ޑައުން ސިންޑްރޯމް ހުންނަ ފަރާތްތަކާއި ކުދިންގެ ކަރާމާތައް އުނިކަން ލިބޭފަދަ ބަހުރުވައިން އެ ފަރާތްތަކަށް ނިސްބަތްކޮށް ވާހަކަދައްކާ ކޮންޓެންޓު ބްރޯޑްކުރުން ކުށްވެރިކޮށް އެ ކޮންޓެންޓް ބްރޯޑްކާސްޓްކުރި ރާއްޖެ ޓީވީ އާއި މެދު ފިޔަވަޅު އަޅައިދިނުމަށް އެދި އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ބްރޮޑްކާސްޓިންގ ކޮމިޝަނަށް ހުށަހަޅައިފިއެވެ.
އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވަނީ ނުކުޅެދުންތެރިކަން ހުންނަ ފަރާތްތަކުގެ ކަރާމާތައް އުނިކަން ލިބޭފަދަ ބަހުރުވައިން އެ ފަރާތްތަކަށް ނިސްބަތްކޮށް ވާހަކަދައްކާ ކޮންޓެންޓު ބްރޯޑްކުރުން ކުށްވެރިކޮށް އަދި ދިވެހި މުޖްތަމަޢުގައި ތިބި ޚާއްޞަ ރައްކާތެރިކަމާ އަޅާލުމާ ލޯބި ލިބެން ޖެހޭ އެންމެހާ ފަރާތްތަކުގެ އިންސާނީ ކަރާމަތާ ޙައްޤުތައް ކަށަވަރު ކުރެވޭނެ ފަދަ ގޮތްތަކަށް މުޖުތަމަޢުގެ ހުރިހާކަމެއް ރޭވުމަށް އިލްތިމާސްކޮށް ނޫސްބަޔާނެއް ނެރެފައެވެ.
އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ނެރުނު ނޫސްބަޔާނުގައި ވަނީ ނުކުޅެދުންތެރިކަން ހުންނަ ފަރާތްތަކަކީ ދިވެހިރާއްޖެ ބައިވެރިވެފައިވާ އެންމެހާ ބައިނަލްއަޤުވާމީ މުޢާހަދާތަކުންނާއި ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 35 ވަނަ މާއްދާއިން ޚާއްޞަ ރައްކާތެރިކަން ލިބިގެންވާ ފަރާތްތަކެއް ކަމަށެވެ. އެއާއެކު ދިވެހީ ރާއްޖޭގެ ޤާނޫނު އަސާސީގެ ދަށުން ނުކުޅެދެންތެރިކަން ހުންނަ މީހުންގެ ކަރާމާތަށް އިޙްތިރާމްކުރުމާއި އަމިއްލަވަންތަކަމާއި މިނިވަންކަމާއެކު ދިރިއުޅުމުގެ ފުރުޞަތު ލިބުމަކީ އެފަރާތްތަކަށް ލިބިގެންވާ ޙައްޤެއް ކަމަށެވެ.
އެ ވުޒާރާއިން ވިދާޅުވީ މި ހާދިސާއަކީ މުޖުތަމަޢުގައި ތިބި ޚާއްޞަ ރައްކާތެރިކަން ބޭނުންވާ ފަރާތްތަކުގެ ތެރެއިން ނުކުޅެދުންތެރިކަން ހުންނަ ފަރާތްތަކަށް އަޅާލުމާއި، އޯގާތެރި މުޖުތަމަޢެއް ބިނާކުރުމަށް ކުރަމުންދާ މަސައްކަތްތަކަށް ހީނަރުކަން ލިބިގެންދާނެކަމެއް ކަމަށެވެ. އަދި މިފަދަ ކަންކަން ތަކުރާރުވެގެން ދިއުމަކީ ނުކުޅެދުންތެރިކަން ހުންނަ ފަރާތްތަކާއި ކުދިންގެ އިންސާނީ ކަރާމާތައް އުނިކަން ލިބޭފަދަ ވާހަކަތައް ދެއްކުން ނޯމަލައިޒްވެގެން ދިއުމުގެ ފުރުސަތު ވެސް އޮތްކަމެއްކަމެއް ކަމަށް އެވުޒާރާއިން ނެރެފައިވާ ނޫސް ބަޔާނުގައި ވެއެވެ.
އެހެންކަމުން މިކަންކަމަށް ރިއާޔަތްކޮށް އޯޓިޒަމް އަދި ޑައުން ސިންޑްރޮމް ހުންނަ ފަރާތްތަކާއި އޯޓިޒަމް އަދި ޑައުން ސިންޑްރޯމް ހުންނަ ކުޑަކުދިންގެ ކަރާމާތަށް އުނިކަން ލިބޭފަދަ ބަހުރުވައަކުން ވާހަކަދައްކާފައިވާތީ، މިކަން އެ މިނިސްޓްރީގެ ސަމާލުކަމަށް އައި ހިސާބުން އެކަމާ ގުޅިގެން ޤާނޫނާއި ގަވާއިދާ އެއްގޮތްވާ ގޮތުގެ މަތިން، ރާއްޖެ ޓީވީ އާއި މެދު ފިޔަވަޅު އަޅައިދިނުމަށް އެދި އެނިސްޓްރީއިން ބްރޮޑްކާސްޓިންގ ކޮމިޝަނަށް މައްސަލަ ހުށަަހަޅާފައިވާކަމަށް ނޫސްބަޔާނުގައި ވެއެވެ.
މީގެ އިތުރުން ދިވެހި މުޖްތަމަޢުގައި ތިބި ޚާއްޞަ ރައްކާތެރިކަމާ އަޅާލުމާ ލޯބި ލިބެން ޖެހޭ އެންމެހާ ފަރާތްތަކުގެ އިންސާނީ ކަރާމަތާ ޙައްޤުތައް ކަށަވަރު ކުރެވޭނެ ފަދަ ގޮތްތަކަށް މުޖުތަމަޢުގެ ހުރިހާކަމެއް ރޭވުމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވަނީ އިލްތިމާސް ކޮށްފައެވެ. ޚާއްޞަކޮށް ޒަމާނުއްސުރެ މީޑިޔާގައި މިފަދަ ފަރާތްތަކަށް ދެމުން އައި އޯގާތެރިކަމާއި ލޯތްބަށް އުނިކަމެއް ލިބިދާނެ އެންމެހާ ކަންތައްތައް އެއްވެސް ފަރާތަކުން ނުކުރުމަށްވެސް ވަނީ އެދިފައެވެ.
އެއާއެކު ނުކުޅެދުންތެރިކަން ހުންނަ ފަރާތްތަކުގެ ޙައްޤުތައް ކަށަވަރު ކުރުމުގައި ކުރަމުންދާ މަސައްކަތްކަތުގައި އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ދެމި ހުންނާނެ ކަމުގެ ޔަޤީންކަން އެންމެހާ ރައްޔިތުންނާއި، ނުކުޅެދުންތެރިކަން ހުންނަ ފަރާތްތަކާ އެ ފަރާތްތަކުގެ ޢާއިލާ ތަކަށް އަރުވާފައިވެއެވެ.
މިއީ ރާއްޖެ ޓީވީން ގެނެސްދިން "ކާލާބައިސާ" ނަމަކަށް ކިޔާ ޕްރޮގްރާމެއްގައި ނުކުޅެދުންތެރިކަން ހުންނަ ފަރާތްތަކަށް ނިސްބަތްކޮށް، ކުދިންގެ ކަރާމާތަށް އުނިކަން ލިބޭފަދަ ބަހުރުވަޔަކުން އެފަރާތްތަކަށް ނިސްބަތްކޮށް ވާހަކަ ދައްކާ ޢަމަލުކޮށްފައިވާތީ، އެކަމާއި ގުޅިގެން އެ މިނިސްޓްރީން ނެރެފައިވާ ނޫސް ބަޔާނެކެވެ.