ޚަބަރު
އަމާޒަކީ ފަސް އަހަރު ތެރޭ 1،000 ކުދިން ޙާފިޘުންނަށް ހެދުން: ވަޒީރު ޝަހީމް

އިސްލާމީ ކަންތައްތަކާބެހޭ ވަޒީރު ޑރ މުޙައްމަދު ޝަހީމް ޢަލީ ސަޢީދު
އަމާޒަކީ ފަސް އަހަރު ތެރޭ 1،000 ކުދިން ޙާފިޘުންނަށް ހެދުން ކަމަށް އިސްލާމީކަންތައްތަކާބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ޙާފިޘުން ދަސްވެނިވުމުގެ ރަސްމިއްޔާތުގައި ވާހަކަފުޅުދައްކަވަމުން އިސްލާމީކަންތައްތަކާބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވީ، އަމާޒަކީ ކޮންމެ އަހަރަކު 100 ޙާފިޘުން ދަސްވެނިވާ މިންވަރަށް މި މަޝްރޫއު ފުޅާކުރުން ކަމަށެވެ. އެގޮތުން ފަސް އަހަރު ތެރޭގައި 1،000 ކުދިން ޙާފިޘުންނަށް ހެދުމުުގެ އަމާޒަށް ވަޞިލް ވެވޭނެ ކަމަށްވެސް ވަޒީރު ވިދާޅުވިއެވެ.
އަހަރެއްގެ ތެރޭގައި އެންމެ ގިނަ ޙާފިޘުން ދަސްވެނިވި އަހަރު ކަން ފާހަގަ ކުރައްވާ، ވަޒީރު ވިދާޅުވީ ޤުރުއާން ހިތުދަސްކުރާ ޙާފިޘުންނަށް، ޙާފިޘުކަމުގެ ސަނަދު އެރުވުމަށް ވަކި ރަސްމިއްޔާތެއް ބޭއްވުމަކީ ޤުުރުއާނަށް އިސްކަން ދިނުމުގެ ތެރެއިން ރައީސުލްޖުމްހޫރިއްޔާ ނިންމެވި ވަރަށް މުހިންމު ނިންމެވުމެއް ކަމަށެވެ.
ވަޒީރު ވިދާޅުވީ އިސްލާމީ މަރުކަޒެއް ޤާއިމުވެފައިވާ ކޮންމެ ރަށެއްގައި ޤުރުއާން ހިތުދަސް ކުުރުމުގެ މަޝްރޫޢު ފުޅާކޮށް ކުރިއަށް ގެންދަވާނެ ކަމަށެވެ. ހަމައެއާއެކު ހުރިހާ ރަށެއްގައި މިސްކިތްތަކުގައި އެ މަޝްރޫޢު ކުރިއަށް ގެންދަވާނެ ކަމަށްވެސް ވަޒީރު ވިދާޅުވިއެވެ. އަދި ކީރިތި ޤުރުއާން ކިޔަވައިދޭ ސެންޓަރުތަކާއި ކިލާސްތަކާއި ޙިފުޒު ކުލާސްތަކަށް ސަރުކާރުން އެހީތެރިވެ ދެއްވާނެ ކަމަށްވެސް ޑރ.ޝަހީމް ވިދާޅުވިއެވެ.
ކީރިތި ޤުރްއާނާބެހޭ މަރުކަޒުން އިންތިޒާމްކޮށްގެން ކުރިއަށްގެންދިޔަ މި ރަސްމިއްޔާތުގައި ރައީސުލްޖުމްހޫރިއްޔާގެ ދެކަނބަލުން ވަނީ ބައިވެރިވެވަޑައިގެން، ޖަލްސާ ޝަރަފްވެރި ކޮށްދެއްވާފައެވެ. ދަސްވެނިވި ޙާފިޡުންނަށް ޙާފިޡުކަމުގެ ސެޓްފިކެޓް ހަވާލުކޮށްދެއްވާފައިވަނީ ރައީސް ޑރ.މުހައްމަދު މުޢިއްޒުއެވެ. މި ރަސްމިއްޔާތުގައި 24 ޙާފިޡުންނަށް ދަސްވެނިވުނުކަމުގެ ސެޓްފިކެޓް ރައީސުލްޖުމްހޫރިއްޔާ ހަވާލުކޮށްދެއްވާފައިވެއެވެ.