ސްޓޫޑެންޓް ލޯނަށް ރައީސް ގެނެސްދެއްވި ބަދަލަކީ ދީނަށް ލޯބިކުރާ ކޮންމެ މީހަކު އުފާވާނެ ކަންކަން: ޑރ އަލީ ޒާހިރު

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސްޓޫޑެންޓް ލޯނު އިސްލާމީ ޝަރީޢާއާ އެއްގޮތަށް ބަދަލުކުރުމަށް ނިންމެވި ނިންމެވުމަށް، ދީނީ ޢިލްމުވެރިޔާ ޑރ. ޢަލީ ޒާހިރު ބިިން ސަޢީދް ޤާސިމް މަރުޙަބާ ކިޔުއްވައިފިއެވެ. މި ނިންމެވުމަކީ ދީނަށް ލޯބިކުރާ ކޮންމެ މީހަކު އުފާވާނެ ކަމެއް ކަމަށް ޑރ. ޢަލީ ޒާހިރު  ވިދާޅުވެފައިވެއެވެ.

ޑރ. ޢަލީ ޒާހިރު އެކްސް  ގައި ކުރެއްވި ޕޯސްޓެއްގައި ވިދާޅުވެފައިވަނީ، "ރިބާ ހިމެނޭގޮތަށް ކުރިން ދޫކުރަމުން އައި ސްޓޫޑެންޓް ލޯނު، އިސްލާމީ ޝަރީޢާ ހުއްދަ ކުރާ ގޮތަށް ބަދަލު ކުރަން ނިންމެވި ކަމަށްޓަކައި ރައީސުލް ޖުމްހޫރިއްޔާ އަށް އިޚްލާސްތެރިކަމާއެކު ޝުކުރު ދަންނަވަން. މިފަދަ ކަންކަމަކީ ދީނަށް ލޯބިކުރާ ކޮންމެ މީހަކު އުފާވާނެ ކަންކަން" ކަމަށެވެ.

ރައީސް މުޢިއްޒު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައިވަނީ، މަތީ ތަޢުލީމާއި ތަމްރީނު ހޯދަން ދޫކުރާ އަދި ދޫކޮށްފައިވާ ލޯނުތަކަކީ އިސްލާމީ ހަމަތަކަށް ފެތޭ "ޝަރީޢާ ކޮމްޕްލަޔަންޓް" ލޯނުތަކަކަށް ހެދުމަށް  ހަޔަރ އެޑިއުކޭޝަން މިނިސްޓްރީއަށް އަންގަވާފައިވާ ކަމަށެވެ. 

އޭގެ ތެރޭގައި ލޯނާ އެކު، އިދާރީ ފީގެ ގޮތުގައި މިހާރު ނަގާ އެއް ޕަސެންޓު އެއްކޮށް ކަނޑާލައި، ދޫކުރާ ލޯނު ފައިސާގެ އިތުރުން އެއްވެސް ވަރެއް އިތުރަށް ނުނެގުން ހިމެނެ އެވެ.

ކުރިން ނަގާފައިވާ ލޯނަށް ދައްކަން ހުންނަ ފައިސާއިން އެޑްމިނިސްޓްރޭޓިވް ފީ ކަނޑާލައި އެ ދަރިވަރުންގެ ލޯނު އަލުން ހަމަޖެއްސުމަށް ރައީސް ވަނީ އަންގަވައިފަ އެވެ.

ރިބާ ހިމެނޭގޮތަށް ކުރިން ދޫކުރަމުން އައި ސްޓޫޑެންޓް ލޯނު، އިސްލާމީ ޝަރީޢާ ހުއްދަ ކުރާ ގޮތަށް ބަދަލު ކުރަން ނިންމެވި ކަމަށްޓަކައި ރައީސުލް ޖުމްހޫރިއްޔާ @MMuizzu އަށް އިޚްލާސްތެރިކަމާއެކު ޝުކުރު ދަންނަވަން. މިފަދަ ކަންކަމަކީ ދީނަށް ލޯބިކުރާ ކޮންމެ މީހަކު އުފާވާނެ ކަންކަން. https://t.co/GkjqUCtNjh

— Dr.Ali Zahir bin Saeed Gasim (@alizahirsaeed) March 27, 2025