ސަޢުދީ ސަރުކާރުން ފަލަސްޠީނު ރައްޔިތުންނަށް މާލީ އެހީތެރިކަން ފޯރުކޮށްދިނުމަށް ނިންމައިފި

ސަޢޫދީ ޢަރަބިއްޔާއިން ފަލަސްޠީނު ރައްޔިތުންނަށް މަހުން މަހަށް މާލީ އެހީތެރިކަން ފޯރުކޮށްދިނުމަށް ނިންމައިފިއެވެ.

ސަޢުދީގެ ފޮރިިން މިނިސްޓްރީން ނެރެފައިވާ ބަޔާނެއްގައި ވަނީ މި އިސްނެގުމުގެ މައިގަނޑު މަޤްޞަދަކީ ޣައްޒާއާއި، ވަށައިގެންވާ ސަރަޙައްދުތަކަށް ދިމާވެފައިވާ ހާލަތު ރަނގަޅު ކުރުމަށް އެހީތެރިވުން ކަމަށެވެ. ސަޢޫދީ ޢަރަބިއްޔާގެ މި އެހީތެރިކަމުގެ ސަބަބުން ހަނގުރާމައިގެ ސަބަބުން ގޯސްވެފައިވާ ނާޒުކު އިންސާނީ ހާލަތު ލުއިކޮށްދިނުމަކީ އަމާޒެއްކަމަށް ސަޢުދީން ވިދާޅުވެއެވެ.

 ސަޢޫދީ ޢަރަބިއްޔާއިން މީގެ ކުރިން ވެސް ވަނީ 5.3 ބިލިއަން ޑޮލަރަށްވުރެ ގިނަ އަދަދެއްގެ އެހީ ފަލަސްތީނުގެ ރައްޔިތުންނަށް ފޯރުކޮށްދީފައެވެ. ސަޢުދީން ވިދާޅުވެފައި ވަނީ މާލީ އެހީތެރިކަމަކީ ފަލަސްޠީނުގެ މައްސަލައާ ގުޅޭގޮތުން ޢަރަބި އަދި އިސްލާމީ ޤައުމުތަކުގެ މެދުގައި އެއް އަޑެއްފެތުރުމާއި، ފަލަސްޠީނުގެ ވަކި ދައުލަތެއް ޤާއިމުކުރުމަށް ސަޢޫދީ ޢަރަބިއްޔާއިން ކުރަމުންދާ ފުޅާ މަސައްކަތުގެ ބައެއް ކަމަށެވެ.

މި އިޢުލާނުގައިވަނީ ސަޢުދީން މަސައްކަތް ކުރަމުންދަނީ، ހަނގުރާމަ ހުއްޓުވުމަށް ގެނައުމަށާއި، އާންމު ރައްޔިތުންގެ ރައްކާތެރިކަން ކަށަވަރު ކުރުމާއި، އަދި ފަލަސްޠީނުގެ ރައްޔިތުންނަށް އިންސާނީ އެހީ އިތުރުކުރުމަށް ބައިނަލްއަޤްވާމީ މުޖުތަމަޢުއާ މުޢާމަލާތްކުރުމުގައެވެ. ސަޢޫދީ ޢަރަބިއްޔާއިން އިންސާނީ އަދި ތަރައްޤީގެ މަޝްރޫޢުތަކުގައިވެސް ފަލަސްޠީނަށް ދެމުންދާ އެހީތެރިކަން އިތުރުކުރުމަށް ދެމިހުންނާނެ ކަމުގައި މި އިޢުލާނުގައި ބަޔާންކޮށްފައިވެއެވެ.

ސަޢުދީގެ މި ނިންމުމުން ފާހަގަކޮށްދެނީ ދެ ޙަރަމްފުޅުގެ ޚާދިމު، ސަލްމާން ރަސްގެފާނާއި ވަލީޢަހުދު މުޙައްމަދު ބިން ސަލްމާން، އިސްރާއީލުން ހިންގަމުންދާ ލާއިންސާނީ ޢަމަލުތަކާއި، ބައިނަލްއަޤްވާމީ ޤާނޫނުތަކާ ޚިލާފުވުމުގެ ސަބަބުން ފަލަސްޠީނުގެ ރައްޔިތުންނަށް ކުރިމަތިވެފައިވާ ދަތިތަކުން އަރައިގަތުމަށް އެހީތެރިވުމަށް ކުރައްވާ މަސައްކަތްޕުޅެވެ.