ލުބްނާނުގެ ރައްޔިތުންނަށް ސިއްޙީ އަދި އިންސާނީ އެހީތެރިކަން ފޯރުކޮށްދިނުމަށް ސަޢުދީ ސަރުކާރުން ނިންމައިފި

އިސްރާއިލުން ލުބުނާންއަށް ދެމުން ގެންދާ ހަމަލާތަކުގެ ސަބަބުން ހާލުގައި ޖެހިފައިވާ ރައްޔިތުންނަށް ޞައްޙީ އަދި އިންސާނީ އެހީތެރިކަން ފޯރުކޮށްދިނުމަށް ސަޢުދީ އަރަބިއްޔާއިން ނިންމައިފިއެވެ.

ސަޢުދީގެ ފޮރިން މިނިސްޓްރީން ނެރުނު ބަޔާނެއްގައި ވަނީ ލުބުނާނުގައި ހިނގަމުންދާ ހަމަނުޖެހުންތަކާއި ގުޅިގެން ކަންބޮޑުވުން ފާޅުކޮށްފައެވެ. އަދި ލުބުނާނުގެ އިސްތިޤްލާލާއި ސަރަޙައްދީ އެއްބައިވަންތަކަން ދެމެހެއްޓުމަށް ޓަކައި، އެ ގައުމުގެ ރައްޔިތުންނާ ދެކޮޅަށް ދެމުންދާ ޙަމަލާތައް ހުއްޓުމަށް ސަޢުދީއިން ވަނީ ގޮވާލައިފައެވެ.

ސެޕްޓެންބަރު 23ވަނަ ދުވަހުން ފެށިގެން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ ޝަހީދު ކޮށްލާފައިވާ މީހުންގެ ޢަދަދު 1,670އަށް އުފުލިފައިވާ ކަމުގައި ލުބްނާންގެ ޞިއްޙަތާ ބެހޭ ވުޒާރާއިން ބުނެފައިވެއެވެ. އޭގެ ތެރޭގައި 100އަށްވުރެ ގިނަ ކުޑަކުދިން ހިމެނެއެވެ. އަދި, 6,000އަށްވުރެ ގިނަ މީހަކު ވަނީ ޒަޚަމު ކޮށްލާފައެވެ. އަދި, މިލިޔަނަކަށް ވުރެ ގިނަ މީހުން ވަނީ ގެދޮރު ނެތިކޮށްލާފައެވެ.

ސަޢުދީން ނެރެފައިވާ ބަޔާނުގައި ވަނީ ހަނގުރާމައިން އެ ސަރަހައްދާއި ރައްޔިތުން ސަލާމަތް ކުރުމަށް ބައިނަލްއަޤްވާމީ މުޖުތަމަޢުގެ ޒިންމާތައް އަދާ ކުރުމަށް ގޮވާލައްވާފައެވެ.  ސަޢުދީން ލުބުނާނަށް އެހީތެރިކަން ފޯރުކޮށްދިނުމަށް ނިންމާފައިިވާއިރު ސަޢުދީން ވަނީ ޣައްޒާއާއި، ވަށައިގެންވާ ސަރަޙައްދުތަކަށް ދިމާވެފައިވާ ހާލަތު ރަނގަޅު ކުރުމަށް އެހީތެރިކަން ފޯރުކޮށްދިނުމަށްވެސް ނިންމާފައެވެ. ސަޢޫދީ ޢަރަބިއްޔާގެ މި އެހީތެރިކަމުގެ ސަބަބުން ހަނގުރާމައިގެ ސަބަބުން ގޯސްވެފައިވާ ނާޒުކު އިންސާނީ ހާލަތު ލުއިކޮށްދިނުމަކީ އަމާޒެއްކަމަށް ސަޢުދީން ވިދާޅުވެއެވެ.