ޝައްވާލު މަހުގެ ފުރަތަމަ 7 ދުވަހުވެސް ހެނދުނު އިމިގްރޭޝަންގެ އޮފީސް ހުޅުވާނެ

ޝައްވާލު މަހުގެ ފުރަތަމަ 7 ދުވަހުވެސް ހެނދުނު އިމިގްރޭޝަންގެ އޮފީސް ހުޅުވާ، ޚިދުމަތް ދެމުން ގެންދާނެ ކަމަށް އިމިގްރޭޝަނުން ވިދާޅުވެއްޖެއެވެ. 

އިމިގްރޭޝަނުން ވިދާޅުވީ މާލޭ އޮފީހަށް ހާޒިރުވެ ޕާސްޕޯޓަށް ހުށަހެޅުމަށް ޝައްވާލު މަހުގެ ފުރަތަމަ ހަތް ދުވަސް ތެރޭގައި ހެނދުނު 9:15 އިން 12:00 އަށް އޮފީސް ހުޅުވާނެ ކަމަށެވެ. އެހެން ނަމަވެސް މާލޭ އިމިގްރޭޝަން އޮފީހަށް ގޮސްގެން ޕާސްޕޯޓަށް އެދި ހުށަހެޅޭނީ 65 އަހަރުން މަތީ ފަރާތްތަކަށާއި އެހެނިހެން ޚާއްސަ ހާލަތެއްތަކުގައި އެދޭ ފަރާތްތަކަށް އެކަންޏެވެ.

އެގޮތުން ޕާސްޕޯޓް ދޫކުރުމަށް ކޮންމެ ދުވަހެއްގެ ވެސް ހެނދުނު 9:15 އިން މެންދުރު 12:00 އަށް ކިޔުބީ މެދުވެރިކޮށް ނަމްބަރު ދޫކުރާނެއެވެ. އަދި އިމުގާ ޕޯޓަލް މެދުވެރިކޮށް މާލެ ސަރަހައްްދުން 24 ގަޑިއިރު ޕާސްޕޯޓަށް ފޯމް ހުށަހެޅޭނެއެވެ.

އިމިގްރޭޝަނުގެ އެންފޯސްމަންޓް އެންޑް ކޮމްޕްލަޔަންސް ޑިވިޝަންގެ ޚިދުމަތް ހުކުރު ދުވަސް ފިޔަވައި ކޮންމެ ދުވަހެއްގެ 9:00 އިން 13:00 އަށް ލިބެން ހުންނާނެ ކަމަށާއި، ސީޕޯޓްގެ ޚިދުމަތް ލިބޭނީ ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 8:00 އިން 17:00 އަދި ރޭގަނޑު 21:00 އިން 00:00 އަށް ކަމަށްވެސް އިމިގްރޭޝަނުން ވިދާޅުވިއެވެ. ހުކުރު ދުވަހު ސިޕޯޓްގެ ހިދުމަތް ލިބޭނީ 14:30 އިން 17:00 އަށް އަދި 21:00 އިން 00:00 އަށެވެ.