ފްލެޓް ލިސްޓަށް ޝަކުވާ ހުށަހަޅަން މާލޭ ސިޓީ ކައުންސިލުން އެހީވާން ނިންމައިފި

ގެދޮރުވެރިޔާ ސްކީމްގެ ދަށުން ދޫކުރި ފްލެޓް ލިސްޓަށް ޝަކުވާއަށް ހުށަހެޅުމުގެ ފުރުސަތު ފަސޭހަކޮށްދިނުމުގެ ގޮތުން މާލޭ ސިޓީ ކައުންސިލުން އެކަމުގައި އެހީތެރިކަން ފޯރުކޮށްދޭން ނިންމައިފި އެވެ.

މާލެ ސިޓީ ކައުންސިލުން ވިދާޅުވީ، ގެދޮރުވެރިޔާ ސްކީމްގެ ދަށުން ޝަކުވާ ހުށަހެޅުމަށް ބޭނުންވާ ފަރާތްތަކަށް އެހީތެރިކަން ފޯރުކޮށް ދިނުމުގެ ކަންކަން އެ އިދާރާގެ އާއްމު ހިިދުމަތްތަކާބެހޭ ބައިގައި މިއަދުން ފެށިގެން އެޕްރީލް 15 ވަނަ ދުވަހުގެ ނިޔަލަށް ހުކުރު ދުވަސް ފިޔަވައި ކޮންމެ ދުވަހަކު ކުރިއަށް ގެންދާނެ ކަމަށެވެ.  ގެދޮރުވެރިޔާ ސްކީމުގެ ދަށުން އާންމުކުރި ފްލެޓް ލިސްޓަށް ޝަކުވާ ހުށަހެޅުމުގެ މުއްދަތު ސަރުކާރުން އިތުރު ކޮށްފަައިފައިވަނީވެސް އޭޕްރީލް މަހުގެ 15ގެ ނިޔަލަށެވެ.

އެގޮތުން އާންމު ހިދުމަތްތަކާ ބެހޭބައި މިއަދުން ފެށިގެން އޭޕްރީލް 5 ވަނަ ދުވަހުގެ ނިޔަލަށް،  ހެނދުނު 10:00 އިން މެންދުރު 2:30 އަށް އަދި ރޭގަނޑު 9:30 އިން 11:00 މި ޚިދުމަތް ދިނުމަށް ހުޅުވާފައި ހުންނާނެ ކަމަށް ވިދާޅުވިއެވެ. ނަމަވެސް އޭޕްރީލް 6 އިން ފެށިގެން 15 ވަނަ ދުވަހުގެ  ނިޔަލަށް ހުޅުވާފައި ހުންނާނީ ހެނދުނު 9:00 އިން ހަވީރު 4:00 އަށް ކަމަށް ސިޓީ ކައުންސިލުން މަޢުލޫމާތު ދެއެވެ. އަދި މި މުއްދަތުގައި ރޭގަނޑު ހިދުމަތް ދޭނީ 9:00 އިން 11:00 އަށެެވެ.

ހައުސިންގް މިނިސްޓްރީން ފްލެޓް ލިސްޓަށް ޝަކުވާ ހުށަހެޅުމުގެ މުއްދަތު އަންނަ އޭޕްރީލް މަހުގެ 15 ވަނަ ދުވަހުގެ ނިޔަލަށް ވަނީ އިތުރު ކޮށްފައެެވެ. ލިސްޓާ ގުޅިގެން ހުށަހަޅަމުންދާ ޝަކުވާތަކަށް ރިއާޔަތްކޮށް، އެކި ފަރާތްތަކުގެ ކަންބޮޑުވުންތައް ހުރުމުން އެކަންކަން ރަނގަޅު ކުރުމުގެ މަސައްކަތްވެސް ކުރާނެ ކަމަށް މިނިސްޓްރީން ވިދާޅުވެފައި ވެއެވެ.