މިސްކިތްތަކުގެ އިމާމުން ފިޤުހުވެރިވުމަކީ ވަރަށް މުހިންމުކަމެއް: ޑރ ޝަހީމް

މިސްކިތްތަކުގެ އިމާމުން ފިޤުހުވެރިވުމަކީ ވަރަށް މުހިންމުކަމެއް ކަމަށް އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. 

ފޭސްބުކުގައި ކުރެއްވި ޕޯސްޓެއްގައި ވަޒީރު ވިދާޅުވީ، ފިޤުހުވެރިވުމަކީ ޝަރުޢުގެ ޙުކުމްތައް އެވަގުތެއްގެ ޙާލަތުގައި ކަންއޮތްގޮތުގެ މައްޗަށް ފައްތައި ޢަމަލުކުރުމަށް ދަނެގަތުން ކަމަށެވެ. އެގޮތުން ފިޤުހުވެރިވުމަކަށް ކޮންމެހެން މާ މަތީ ޑިގްރީއެއް އޮތުން ލާޒިމެއް ނޫން ކަމަށާއި، އަޙްކާމްތަށް ތަޠްބީޤުކުރުމަށް ދެނެގަތުން ފުދޭ ކަމަށް ވަޒީރު ވިދާޅުވިއެވެ.

މިކަމަށް މިސާލު ޖައްސަވަމުން ވަޒީރު ވިދާޅުވީ:

"މިސާލަކަށް 7.00 ޖަހާއިރު ޢީދު ނަމާދު ފަށާއިރު، 7.00 ތެދުވެ ވަގުތުން ހަށަން ބަނުމުގެ ބަދަލުގައި 7.00 ކުރިން ތެދުވެ 7.00 ވާއިރަށް ބޮޑުވެގެންވާ އެޖަމާާއަތުގެ ސަފުތައް ތަރުތީބުކޮށްލެވޭނެހައި ވަގުތު އޮތްވައި ތެދުވެ ސަފުތަރުތީބު ކުރުމަށް ޖާގަ ދިނުން."

ހަމައެއާއެކު ފަރުޟު ނަމާދު ކުރާ ނަމަ، ޖަމާއަތް ބޮޑުވި ވަރަކަށް ކިޔެވުން ކުރު ކުރުމާއި، ޖަމާޢަތުގައި ނަމާދު ކުރަމުން ދަނިކޮށް ކުޑަކުދިން ރޯއަޑު އިވިއްޖެ ނަމަ ނަމާދު އަވަސް ކުރުމާއި، މިސްކިތް ކައިރީގައި އެހެނިހެން މިސްކިތްތަކާއި މީހުން ދިރިއުޅޭ ގޭގޭ ހުރި ނަމަ ތާޅަ ފިއްޔަށް ނަމާދު ކުރާ އަޑު ނުޖެއްސުމަކީ އެމީހުންނަށް އުނދަގޫ ވެދާނެ ކަމެއްކަމަށް ވިދާޅުވިއެވެ.

ވަޒީރު ވިދާޅުވީ އެއްބަޔަކު އަނެއްބަޔަކަށް ޤުރުއާން ކިޔެވުމުގެ އަޑު އުފުލައި އުނދަގޫވާގޮތް ހެދުމަކީ ހަދީސްގައި ނަހީކުރެވިގެންވާ ކަމެއް ކަމަށެވެ. ނަމަވެސް މި ޙާލަތުގައި ވެސް ނަމާދު ވަގުތު ވަދެއްޖެކަން އިޢުލާން ކުރުމަށް ބަންގި ގޮވާއިރު ތާޅަ ފިއްޔަށް އަޑު ދޭން ޖެހޭކަމަށް ވަޒީރު ވިދާޅުވިއެވެ.

މީގެ އިތުރުން ދަމު ނަމާދާއި ޖަމާޢަތުގައި ނަމާދުކުރާއިރު ރުކޫޢާއި ސުޖޫދު ކުރުމުގައި އެހާގިނަ އިރު އެގޮތައް ނުތިބެވޭ ބަލި މީހުންނާއި އުޒުރުވެރިން ޖަމާޢަތުގައި ތިބޭނެ ކަމަށް ވިސްނުމާއި ގަދަ އަތްވާއި ނުވަތަ ވިއްސާރަ ވެހޭ ވަގުތު ޖަމާޢަތް ކުރުކުރަން ވާނެ ކަމަށް ވަޒީރު ވިދާޅުވެފައި ވެއެވެ.