ޚަބަރު
ފިޠުރު ޢީދާ ގުޅުވައިގެން ބޭއްވުނު "ޢީދު ހަވީރު" ނިމިއްޖެ

"ޢީދު ހަވީރު" ފޮޓޯ: މޯލްޑިވްސް އިންޑިޕެންޑަންޓް
ފިޠުރު ޢީދާ ގުޅުވައިގެން ބޭއްވުނު "ޢީދު ހަވީރު" އަށް ލިބުނު ބޮޑު ތަރުހީބާއެކު އެ ހަރަކާތް ވަނީ ނިންމާލާފައެވެ. މި ހަރަކާތަށް އެތައް ހާސް ބަޔަކު ޒިޔާރަތްކޮށްފައިވާކަމަށް ވަނީ ފާހަގަކުރެވިފައެވެ.
ފިޠުރު ޢީދު ދުވަސް ހިމެނޭހެން ތިން ދުވަހުގެ މުއްދަތަށް ކުރިއަށް ގެންދެވުނު މި ހަރަކާތް ބޭއްވުނީ ޖުމްހޫރީ މައިދާނާއި، ޝަހީދުންގެ ބިނާ ސަރަޙައްދުގެ އިތުރުން ސަލްޓަން ޕާކުގައެވެ. މިއީ ފަހުގެ ތާރީޚެއްގައި މާލޭގައި ފިޠުރު ޢީދެއް މިހާ ކުލަގަދަކޮށް ފާހަގަކުރެވުނު ފުރަތަމަ ފަހަރު ކަމަށް ވަނީ ފާހަގަކުރެވިފައެވެ.
ޤައުމީ ދިފާޢީ ބާރުން އިސްނަގައިގެން ސަރުކާރުގެ ބައެއް މުއައްސަސާތަކާއި ސަރުކާރު ހިއްސާވާ ކުންފުނިތަކުގެ ބައިވެރިވުމާއެކު ކުރިއަށް ގެންދެވުނު މި ހަރަކާތުގައި އެކި އުމުރުފުރާގެ ކުދިންނާއި މީހުންނަށް އަމާޒުކޮށްގެން ތަފާތު ހަރަކާތްތަކާއި ކުޅިވަރުތައް ވަނީ ހިމަނާފައެވެ. މީގެ ތެރޭގައި ރާއްޖޭގެ ކުރީގެ ސަޤާފަތް ދައްކާލުމާއި، ކުރީ ޒަމާނުގައި ދިވެހިން ކުޅެއުޅުނު ކުޅިވަރުތައް ހިމެނެއެވެ. އަދި ކުޑަކުދިންނާ ގުޅޭ ޒަމާނީ ކެރެކްޓަރުތައްވެސް ވަނީ ދައްކާލާފައެވެ.
މީގެ އިތުރުން، ޤައުމީ ދިފާޢީ ބާރާއި ފުލުހުންގެ ޚިދުމަތުގައި ގެންގުޅޭ އުޅަނދުތަކާއި އާލާތްތައް ދައްކާލުމާއެކު، އެތަކެތި ތަޖުރިބާކުރުމުގެ ފުރުޞަތުވެސް ޢާންމުންނަށް ވަނީ ފަހިކޮށްދީފައެވެ.
ފިޠުރު ޢީދު ދުވަހުގެ ޢީދު ހަވީރުގައި ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ޑރ. މުޙައްމަދު މުޢިއްޒުގެ ޢާއިލާވެސް ބައިވެރިވެ ވަޑައިގެންނެވިއެވެ.
މި ހަރަކާތަކީ އެތައް ހާސް ބަޔަކު އެއްތަނަކަށް ޖަމާވެ، އުފާފާޅުކޮށްލަން ލިބުނު އެންމެ އުފާވެރި އެއް ފުރުޞަތު ކަމަށް ގިނަ ބައިވެރިން ވަނީ ފާހަގަކޮށްފައެވެ.