ޚަބަރު
ޣައްޒާގައި ހާލުގައި ޖެހިފައިވާ ފަރާތްތަކަށް އެހީވުމަށް 5 ލައްކަ ރުފިޔާ ހަވާލުކޮށްފި

ޣައްޒާގައި ހާލުގައި ޖެހިފައިވާ ފަރާތްތަކަށް އެހީވުމަށް އިސްރާ އެސޯސިއޭޝަނާ ފައިފާ ހަވާލުކުރުމުގެ ތެރެއިން- ފޮޓޯ: ޒަކާތު ހައުސް
ޣައްޒާގައި ހާލުގައި ޖެހިފައިވާ ފަރާތްތަކަށް އެހީތެރިކަން ފޯރުކޮށްދިނުމަށް ފިޠުރު ޒަކާތުގެ ގޮތުގައި ލިބިފައިވާ ފައިސާއިން 500،000.00 (ފަސް ލައްކަ) ރުފިޔާ އިސްރާ އެސޯސިއޭޝަންއާ ހަވަލުކޮށްފިއެވެ.
މިއަހަރުގެ ފިޠުރު ޒަކާތުގެ ގޮތުގައި ލިބުނު ފައިސާއިން 5 ލައްކަ ރުފިޔާ ޣައްޒާގެ ކުޑަކުދިންނަށް ހަދިޔާކުރުމަށް ނިންމެވީ ދިވެހި ސަރުކާރުންނެވެ. މިއަހަރަކީ ފިޠުރު ޒަކާތުގެ ގޮތުގައި އެންމެ ގިނަ ޢަދަދެއްގެ ފައިސާ ލިބުނު އަހަރެވެ. ފިތުރު ޒަކާތަށް ފައިސާގެ ގޮތުގައި މި އަހަރު 13.3 މިލިއަން ރުފިޔާ ލިބުނެވެ. އެގޮތުން ފަޤީރުންގެ ދަފްތަރުގައި ތިބި ކޮންމެ ރައްޔިތަކަށް ފިޠުރު ޒަކާތުގެ ގޮތުގައި 4،500 ރުފިޔާ ޖަމާކޮށްދީފައިވާކަމަށް އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް ވިދާޅުވިއެވެ.
އެގޮތުން ފަޤީރުންގެ ދަފްތަރުގައި ތިބި 2،765 މީހުންނަށް ފިޠުރު ޒަކާތުގެ ގޮތުގައި ބަހާފައިވަނީ ޖުމްލަ 12.4 މިލިއަން ރުފިޔާ ކަމަށްވެސް ވަޒީރު ވިދާޅުވިއެވެ. އެއާއެކު ، ބާކީވި ފައިސާއިން 500،000 ރުފިޔާ ޣައްޒާގެ ކުޑަކުދިންނާއި ހާލުގައި ޖެހިފައިވާ މީހުންގެ ކާބޯތަކެއްޗަށް ހަދިޔާކުރުމަށް ނިންމާފައިވާ ކަމަށް މިނިސްޓަރު ވިދާޅުވިއެވެ. މި ފައިސާ މިދިޔަ އާދިއްތަ ދުވަހު އިސްރާ އެސޯސިއޭޝަނާއި ހަވާލުކޮށްފައިވާކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެފައި ވެއެވެ.
ރާއްޖޭގައި ޒަކާތުގެ ނިޒާމް ހަރުދަނާކޮށް އާންމުންނަށް ފަސޭހަ އިންތިޒާމުތަކެއް ހަމަޖެއްސުމުގެ ގޮތުން މި ސަރުކާރުން ވަނީ ޒަކާތާއި ގުޅުންހުރި ކަންކަމަށް ޚާއްޞަކޮށް ދިވެހިރާއްޖޭގެ ޒަކާތު ހައުސް ހުޅުވާފައެވެ. އެގޮތުން ޒަކާތު ހައުސްއިން މީހުން ޒަކާތާ މެދު ހޭލުންތެރިކުރުވުމަށް ރާއްޖޭގެ އެކި ހިސާބުތަކުގައި ގިނަ ޕްރޮގްރާމްތަކެއް ކުރިއަށްގެންދެއެވެ.