ކޮރަޕްޝަނާ ދެކޮޅަށް ބައިނަލްއަގުވާމީ ފޯރަމެއް ބާއްވަން ނިނަމައިފި

ފަތުރުވެރިކަމުގެ ދާއިރާގައި ނަޒާހަތްތެރިކަން ވަރުގަދަކޮށް ކޮރަޕްޝަނާއި ދެކޮޅަށް މަސައްކަތްކުރުމަށް ޚާއްސަ ބައިނަލްއަޤުވާމީ ފޯރަމެއް ރާއްޖޭގައި ބާއްވަން ނިންމައިފިއެވެ.

"ސައުދީ މޯލްޑިވްސް އިންޓަނޭޝަނަލް ފޯރަމް އޮން އިންޓެގްރިޓީ" ގެ ނަމުގައި ބާއްވާ މި ފޯރަމަކީ އެންޓި ކޮރަޕްޝަން ކޮމިޝަން (އޭސީސީ) އާއި ސައުދީގެ އޯވަސައިޓް އެންޑް އެންޓި ކޮރަޕްޝަން އޮތޯރިޓީ ގުޅިގެން ބާއްވާ ފޯރަމެކެވެ.  އައިއޯސީ (އިންޓަރނޭޝަނަލް އޯގަނައިޒޭޝަން އޮފް އިސްލާމިކް ކޯޕަރޭޝަން) ގެ ގަައުމުތަކަށް ޚާއްސަކޮށްގެން ބާއްވާ ފޯރަމް ބޭއްވުމަށް ހަމަޖެހިފައިވަނީ ވިލާ ނައުޓިކާ ރިސޯޓުގައެވެ.

މި ފޯރަމްގައި ފަތުރުވެރިކަމުގެ ދާއިރާގައި ކޮރަޕްޝަން ހުއްޓުވުމަށް އައު އުކުޅުތަކާއި ސްޓްރެޓެޖީތައް ބޭނުން ކުރުމާ ގުޅޭ ގޮތުން މަސައްކަތްކުރުމަށް ވަނީ ހަމަޖެހިފައެވެ. އެގޮތުން މި ފޯރަމަކީ އިސްލާމީ ޤައުމުތަކުގެ އިސްވެރިންނާއި ސިޔާސަތު ކަނޑައަޅާ ފަރާތްތަކާއި،  ފަތުރުވެރިކަމުގެ ސިނާޢަތުގެ މާހިރުން އެއްތަނަކުން ބައްދަލުވާނެ ފޯރަމެއް ކަމަށް އޭސީސީން މަޢުލޫމާތުދެއެވެ. 

ދެ ދުވަހުގެ މުއްދަތަކަށް ކުރިޔަށް ގެންދާ ފޯރަމް އޮންނާނީ މެއި މަހުގެ 6 އަދި 7 ވަަނަ ދުވަހުއެވެ.  މި ފޯރަމްގައި ގާތްގަނޑަކަށް 50 އޯއައިސީގެ ގައުމުން ބައިވެރިވާނެ ކަަމަށް އޭސީސީން ވިދާޅުވިއެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން އޭސީސީގެ ޑިރެކްޓަރ އޮފް ޕްރިވެންޝަން ފާތިމަތު އިބްނާ ވިދާޅުވީ ރާއްޖެއާއި ސައުދީ ގުޅިގެން ކުރިޔަށް ގެންދާ މި ފޯރަމް އިންތިޒާމުކޮށް ހަމަޖެއްސުމަށް ސައުދީން ވަރަށް ބޮޑު އެއްބާރުލުމެއް ދެމުން އަންނަކަމަށެވެ.