މިޔަންމާގެ ބިންހެލުމުގައި މަރުވި މީހުންގެ އަދަދު 3،000 ހުން މައްޗަށް

މިޔަންމާގައި މިދިޔަ ހުކުރު ދުވަހު އައި ވަރުގަދަ ބިންހެލުމުގައި މަރުވި މީހުންގެ އަދަދު 3،000 އަށްވުރެ އިތުރުވެއްޖެއެވެ. އަދި ސަތޭކެއެއްހާ މީހުން ގެއްލިފައިވާ ކަމަށް ވެސް ވަނީ ރިޕޯޓުކޮށްފައެވެ. މި ބިންހެލުމަކީ އެ ޤައުމުގައި ފާއިތުވި ސަތޭކަ އަހަރުގެ ތެރޭގައި އައި އެންމެ ވަރުގަދަ ބިންހެލުންތަކުގެ ތެރެއިން އެއް ބިންހެލުމެވެ.

މިޔަންމާގެ ޖަޕާނުގައި ހުންނަ އެމްބަސީން ބުދަ ދުވަހު ފޭސްބުކުގައި ޝާއިޢުކުރި ޕޯސްޓެއްގައި ބުނެފައިވާ ގޮތުގައި މި ބިންހެލުމުގައި މަރުވި މީހުންގެ އަދަދު 3،003 އަށް އަރާފައިވެއެވެ. އަދި 4،515 މީހުން ޒަޚަމްވެފައިވާ ކަމަށާއި، 351 މީހުން ގެއްލިފައިވާ ކަމަށް ވެސް ވަނީ ބުނެފައެވެ.

މި ބިންހެލުމުގެ ސަބަބުން 28 މިލިއަން މީހުން ދިރިއުޅޭ ސަރަޙައްދުތަކެއް ވަނީ ބޮޑެތި ގެއްލުންތަކާ ކުރިމަތިވެފައެވެ. އިމާރާތްތައް ވެއްޓި، ގިނަ އަދަދެއްގެ މީހުން ކާބޯތަކެއްޗާއި، ބޯފެނާއި، ހިޔާވަހިކަން ގެއްލިފައިވާ ކަމަށް ވެސް ވަނީ ރިޕޯޓުކޮށްފައެވެ.

މި ހާދިސާގައި އެހީތެރިކަން ފޯރުކޮށްދިނުމަށް 15 ޤައުމަކުން 1،900 އަށްވުރެ ގިނަ އެހީތެރިން ވަނީ މިޔަންމާއަށް ފޮނުވާފައެވެ. މީގެ ތެރޭގައި ދެކުނު އޭޝިއާގެ އަވައްޓެރި ޤައުމުތަކާއި، ޗައިނާ، އިންޑިއާ އަދި ރަޝިއާ ހިމެނެއެވެ. އަދި މިހާތަނަށް 53 ފަހަރު މަތިން އެހީގެ ތަކެތި ވައިގެ މަގުން ވަނީ ފޯރުކޮށްދީފައެވެ.

ނަމަވެސް، މޫސުމާބެހޭ ފަރާތްތަކުން އިންޒާރުދީފައިވާ ގޮތުގައި މި އާދިއްތަ ދުވަހުން ފެށިގެން އޭޕްރީލް 11 އާ ހަމައަށް މޫސުމަށް ނުރަނގަޅު ބަދަލުތަކެއް އަތުވެދާނެ ކަމަށް ލަފާކުރެވެއެވެ. މިގޮތުން، މަންޑަލޭ، ސަގައިންގް އަދި ވެރިރަށް ނައިޕިޑޯ ފަދަ ބިންހެލުމުގެ އަސަރު އެންމެ ބޮޑަށް ކުރި ސަރަޙައްދުތަކަށް ވާރޭވެހުމުގެ ފުރުސަތު އޮތް ކަމަށް ވަނީ ބުނެފައެވެ. މިކަމުގެ ސަބަބުން މީހުން ސަލާމަތްކުރުމުގެ މަސައްކަތްތަކަށް އިތުރު ގޮންޖެހުންތަކެއް ކުރިމަތިވެދާނެ ކަމަށް ވެސް ބެލެވެއެވެ.