ތޫނު ހަތިޔާރުން ހަމަލާދިން ކަމުގެ ރިކޯޑް އޮތް އަންހެނެއްގެ މައްޗަށް އަނެއްކާވެސް ބަންދުގެ ޙުކުމެއް!

މާލޭގައި ފިހާރައެއްގެ ސޭޓެއްގެ ކަރަށް ވަޅިން ހަމަލާދިން މައްސަލާގައި ހައްޔަރުކުރި އަންހެން މީހާ، އިތުރު މައްސަލައެއްގައި ތަޙުޤީގު ނިމެންދެން ބަންދުކުރަން ކްރިމިނަލް ކޯޓުން އިއްޔެ އަމުރުކޮށްފިއެވެ. މި އަމުރު ނެރުނީ ތޫނު ހަތިޔާރު ބޭނުންކޮށްގެން އެހެން މީހަކަށް ހަމަލާދިން މައްސަލައެއްގައެވެ.

ތ. ތިމަރަފުށްޓަށް ނިސްބަތްވާ 30 އަހަރުގެ މި އަންހެން މީހާ އެންމެ ފަހުން ހައްޔަރުކޮށްފައިވަނީ މިދިޔަ މަހުގެ 15 ވަނަ ދުވަހުއެވެ. އޭނާ ހައްޔަރުކުރީ ތޫނު ހަތިޔާރު ބޭނުންކޮށްގެން މާރާމާރީ ހިންގުމާއި މުދަލަށް ގެއްލުން ދިނުމުގެ ތުހުމަތުގައެވެ. ކްރިމިނަލް ކޯޓުން ނެރުނު އަމުރުގައި ބަޔާންކޮށްފައިވާ ގޮތުގައި، މި މައްސަލާގައި އޭނާއާ ދެކޮޅަށް ހެކި ލިބިފައިވެއެވެ. ފުލުހުން ބުނާ ގޮތުގައި، އޭނާ ތޫނު އެއްޗަކުން މީހަކަށް ހަމަލާދީފައިވާ ކަމަށާއި، ހައްޔަރުކުރަން އުޅުނު އިރު ބިންމައްޗަށް ވަޅިއެއް ވައްޓާލާފައިވާ ކަމަށް ތުހުމަތުކުރެވެއެވެ.

މި މައްސަލާގައި އެންމެ ފުރަތަމަ އޭނާގެ ބަންދަށް ކްރިމިނަލް ކޯޓުން އިތުރުކުރީ 15 ދުވަހެވެ. އޭރު އޭނާ ބަންދުކުރަން އަމުރުކުރީ އޭނާގެ ކުށުގެ ރިކޯޑު އޮތުމުގެ އިތުރުން، ބިރުދެއްކުމާއި ފޭރުމުގެ ރިކޯޑު އޮތް މީހެއް ކަމަށް ވާތީއެވެ.

މިދިޔަ އަހަރު މާލޭގައި ފިހާރައެއްގެ ސޭޓެއްގެ ކަރަށް ވަޅިން ހަމަލާދިން މައްސަލާގައިވެސް އޭނާ ހައްޔަރުކޮށްފައިވާކަން ފާހަގަކުރެވެއެވެ. އެ މައްސަލާގައި އޭނާ ބުނެފައިވަނީ ހާދިސާ ހިނގި ތަނަށް ދިޔައީ އޭނާގެ ފޯނު ހޯދަން ކަމަށާއި އެއްވެސް މާރާމާރީއެއް ނުހިންގާ ކަމަށެވެ. ނަމަވެސް ފުލުހުން ބުނެފައިވަނީ އޭނާގެ އަތުން ކަޓަރެއް ފެނުނު ކަމަށާއި އަދި އަނިޔާ ލިބުނު މީހާއަށް ހަމަލާދީފައިވަނީ އެ ކަޓަރުން ކަމަށް ބެލެވޭ ކަމަށެވެ.

މީގެ އިތުރުން، ތިމަރަފުށީގައި ވެސް އޭނާ ތޫނު އެއްޗެހިން މީހުންނަށް ހަމަލާދީގެން ދޭތެރެ ދޭތެރެއިން ހައްޔަރުކުރާކަން ފާހަގަކުރެވެއެވެ. މި ހުރިހާ ކަމަކަށް ބަލާއިރު، މި އަންހެން މީހާއަކީ ތޫނު ހަތިޔާރުން ހަމަލާ ދިނުމުގެ ރިކޯޑް އޮންނަ މީހެއްކަން އެނގެއެވެ.