މާލެއިން ވިލިގިއްޔަށް ދިޔަ ބޯޓަކުން އެ ރަށަށް މަސްތުވާތަކެތި އެތެރެކުރަން މަސައްކަތްކޮށްފި

މާލެއިން ފުރައިގެން ގއ. ވިލިގިއްޔަށް ދިޔަ ބޯޓަކުން އެ ރަށަށް މަސްތުވާތަކެތި އެތެރެކުރަން މަސައްކަތްކޮށްފިއެވެ.

މަސްތުވާތަކެއްޗާ ދެކޮޅަށް ފުލުހުން ކުރަމުންގެންދާ މަސައްކަތްތަކުގެ ތެރެއިން ގއ. ވިލިނގިއްޔަށް އެތެރެކުރަން އުޅުނު މަސްތުވާތަކެތީގެ މި ޕެކޭޖު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.

މި މަހުގެ 4 ވަނަ ދުވަހު ފުލުހުން ހިންގި މި އޮޕަރޭޝަނަކީ، މަސްތުވާތަކެތި ވިލިގިއްޔަށް އެތެރެކުރަން އުޅޭ ކަމުގެ މަޢުލޫމާތު ލިބިގެން ހިންގި އޮޕަރޭޝަނެކެވެ. 

އެގޮތުން ފުލުހުންނަށް ލިބުނު މަޢުލޫމާތާ ގުޅިގެން، މި ބޯޓު ވިލިނގިލި ބަނދަރާ ގާތްކުރުމުން ކޯޓު އަމުރެއްގެ ދަށުން އެ ބޯޓު ބަލައިފާސްކުރިއިރު މަސްތުވާތަކެތިކަމަށް ބެލެވޭ އެއްޗެއްހުރި ބޮޑު ރަބަރު ޕެކެޓެއް ފެނިފައިވެއެވެ. 

ފުލުހުން ހާމަކޮށްފައިވާ ގޮތުގައި މި ތަކެތީގެ ވަގުތީ ބަރުދަނުގައި 231 ގްރާމް ހުއްޓެވެ. 

މި މައްސަލައާ ގުޅިގެން އަދި އެއްވެސް މީހަކު ހައްޔަރުކޮށްފައެއް ނުވެއެވެ.

ފުލުހުން ހާމަކޮށްފައިވާ ގޮތުގައި ވިލިނގިލީ ޕޮލިސް ސްޓޭޝަނުން ދަނީ މި މައްސަލަ އިތުރަށް ތަޙުޤީޤު ކުރަމުންނެވެ.