ހުޅުމާލޭގެ "ޕޮކެޓް ޕާކިން" ޒޯނުތަކުން ޖާގައަށް އެދުމުގެ މުއްދަތު އިތުރުކޮށްފި

ހުޅުމާލޭގެ " ޕޮކެޓް ޕާކިން" ޒޯނުތަކުން ޖާގައަށް އެދުމަށް ހުޅުވާލި ފުރުޞަތު ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން އިތުރުކޮށްފިއެެވެ.

އެޗްޑީސީން ވަނި ހުޅުމާލޭގައި ގާއިމްކޮށްފައިވާ އަށް ޒޯނަކުން 1،374 ޕާކިން ޖާގައަށް ކުރިމަތިލުމަށް ހުޅުވާލާފައެވެ. އަދި ޕާކިން ޖާގައަށް ހުށަހެޅޭނީ މާލޭ ސަރަހައްދަށް ރަޖިސްޓްރީކޮށްފައިވާ ކެޓަގަރީ B1 ނުވަތަ C1 ގެ ވެހިކަލެއް އޮންނަ މީހުންނަށެވެ. ޕާކިން ހޯދަން ހުށަހަޅާ މީހަކީ މާލެ ސަރަހައްދުގައި ދިރިއުޅޭ މީހަކަށް ވާން ޖެހޭނެ ކަމަށް ވެސް އެޗްޑީސީން ބުންޏެވެ. މި ޒޯންތައް ކުއްޔަށް ހިފުމަށް އުމުރުން 18 ފުރިފައިވާ ކޮންމެ ދިވެއްސަކަށް ކުރިމަތިލެވޭނެ އެވެ. ކާރާއި ޕިކަޕް ފަދަ ވެހިކަލްތަކަށް އެއް އަހަރަށް ދޫކުރާ މި ޕާކިން ޖާގަތަކުގެ މަހު ކުއްޔަކީ 2،000ރ. އެވެ.

ޕާކިން ޖާގަތައް ދޫކުރާނީ އެ ޖާގަތަކަށް ކުރިމަތިލާ ފަރާތްތަކުގެ ތެރެއިން، ޝަރުތު ހަމަވާ ފަރާތްތަކުގެ މެދުގައި ގުރުއަތު ލައިގެންނެވެ. ޕާކިން ޖާގައަށް އެދި އެޕްލިކޭޝަން ހުށަހެޅުމުގެ ސުންގަޑިއެއްގެ ގޮތުގައި ކުރިން ހަމަޖައްސާފައިވަނީ 01 އޮކްޓޯބަރު 2024އެވެ. މި ތާރީޚު މިހާރު ވަނީ 10 އޮކްޓޯބަރ 2024 އަށް ފަސްކޮށްފައެވެ. ހުޅުމާލެއިން ދޫކުރާ މި ޕޮކެޓް ޕާކިން ޖާގަތަކުގެ ސަބަބުން ވެހިކަލް ޕާކުކުރުމުގެ މައްސަލައަށް ވަރަށް ބޮޑު ހައްލެއް ލިބިގެންދާނެ ކަމަށް އެޗްޑީސީން ބުނެއެވެ.

ޕާކިން ސްލޮޓުތައް ދޫކުރުމުގައި އިސްކަންދޭނެ ވަކި ތަރުތީބެއް އެ ކުންފުނިން ވަނީ އެކުލަވާލާފައެވެ. ފުރަތަމަ އިސްކަންދޭން ނިންމާފައި ޕާކިން ޖާގަ ހޯދަން ހުށަހަޅާފައިވާ ޒޯންގައި ދިރިއުޅޭ ހުޅުމާލޭގެ ރައްޔިތުންނެވެ. އެއަށްފަހު، ޕާކިން ޖާގަ ހޯދަން ހުށަހަޅާފައިވާ ޒޯން ނޫން އެހެން ޒޯނެއްގައި ދިރިއުޅޭ ހުޅުމާލޭގެ ރައްޔިތުންނަށެވެ. ހުޅުމާލެ ފިޔަވައި މާލެ ސަރަހައްދަށް ރަޖިސްޓްރީކޮށްފައިވާ އެހެން ވެހިކަލްތަކަށް ޕާކިން ޖާގަ ދޫކުރަން ނިންމާފައި ވަނީ އެ ވެހިކަލްތަކަށް ފަހު ކަމަށް ވެސް އެޗްޑީސީން ބުންޏެވެ.

ހުޅުމާލޭގައި ގާއިމުކޮށްފައިވާ ޕާކިން ޒޯނުތަކުން ޖާގަ ކުއްޔަށް ހިފުމަށް އެދި ފޯމު ހުށަހެޅުމުގެ ފުރުސަތު ހުޅުވާލާފައިވާ މުއްދަތުގައި ރަސްމީ ކޮންމެ ދުވަހެއްގެ 09:00 އިން 14:00 އަށް އެޗްޑީސީގެ ރިސެޕްޝަނުން ފޯމު ބަލައިގަންނާނެ ކަމަށް އެޗްޑީސީން ބުނެފައިވެއެވެ.