ކުނބުރުދޫ ފުޓުބޯޅަ ދަނޑު ތަރައްޤީ ކުރުމަށް ބޭނުންވާ ތަކެތި އެ ރަށަށް ގެންގޮސްފި

އދ. ކުނބުރުދޫ ފުޓްބޯޅަ ދަނޑު އިތުރަށް ތަރައްޤީކުރުމަށް ބޭނުންވާ ސާމާނު އެ ރަށަށް ފޮނުވައިފިއެވެ.

އެ ރަށުގެ ފުޓުބޯޅަ ދަނޑު ތަރައްޤީ ކުރުމަށް ހަވާލުކޮށްފައިވަނީ ރޯޑް ޑިވެލޮޕްމަންޓް ކޯޕަރޭޝަން ލިމިޓެޑް (އާރްޑީސީ) އާއެވެ. މި މަސައްކަތް އެ ކުންފުންޏާ ހަވާލުކޮށްފައިވަނީ މިދިޔަ ފެބުރުވަރީ މަހެވެ.

އާރުޑީސީއިން ސޯޝަލް މީޑީއާގައި ޙިއްސާކުރި ޕޯސްޓެއްގައި ބުނީ، އެ ރަށުގެ ފުޓުބޯޅަ ދަނޑު ތަރައްޤީ ކުރުމަށް ބޭނުންވާ ތަކެތި ގެންދިއުމަށްފަހު، މިހާރު އެ ތަކެތި އަންލޯޑު ކުރުމުގެ މަސައްކަތް ކުރިޔަށްދާކަމަށެވެ.

މި ދަނޑު އިތުރަށް ތަރައްގީކުރުމުގެ މަސައްކަތުގެ ދަށުން ދަނޑުގެ ސަބްބޭސް ތައްޔާރުކޮށް ޓާފް އެޅުމާއި އަދި ލައިޓިންގ މަސައްކަތް ހިމެނެއެވެ. އަދި މީގެ އިތުރުން ދަނޑަށް އިތުރު ކުރެވުނު ބަޔާއެކު މުޅި ދަނޑުގެ ވަށާފާރާއި، ފެންސް މާރާމާތު ކުރުމާއި، ދަނޑަށް އިތުރު ކުރެވުނު ބައިގައި ކާނުލުން އަދި ދެ ކާނު ދޭތެރޭގައި ސްކްރީޑެއް އެޅުމާއި، ގޭޓު ހަރުކުރުމަށްވެސް ހިމެނެއެވެ.

އަރިއަތޮޅު ދެކުނުބުރީ ކުނބުރުދޫ ފުޓްބޯޅަ ދަނޑު އިތުރަށް ބޮޑުކޮށް، ނުނިމިހުރި މަސައްކަތްތައް ނިންމުމަށް ބޭނުންވާ ސާމާނު އެރަށައް ފޮނުވައި، އަންލޯޑް ކުރުމުގެ މަސައްކަތް ދަނީ ކުރަމުންނެވެ.#TeamRDC pic.twitter.com/swNZz7wJve

— Road Development Corporation Ltd (@rdcmaldives) April 11, 2025

މި މަޝްރޫޢު އާރްޑީސީއާ ހަވާލުކޮށްފައިވަނީ 4،900،741.92 (ހަތަރު މިލިޔަން ނުވަ ލައްކަ ހަތް ސަތޭކަ ސާޅީސް އެއް ރުފިޔާ ނުވަދިހަ ލާރި) އަށެވެ.