އިސްރާއީލަށް ދިން ހަމަލާ ނިމުނީ ކަމަށް އީރާނުން ބުނެފި

ހަނގުރާމަ ފެތުރިދާނެ ކަމުގެ ބިރު އިތުރުވެފައި ވަނިކޮށް އިސްރާއީލަށް ދިން ހަމަލާ ނިމުނީ ކަމަށް އީރާނުން ބުނެފިއެވެ. 

ރޮއިޓަރސް އިން ރިޕޯޓްކޮށްފައިވާ ގޮތުގައި އިސްރާއީލަށް އެ ޤައުމުން ދިން އެންމެ ބޮޑު ހަމަލާ ކަމުގައިވާ މިސައިލް ހަމަލާ ނިމުނީ ކަމަށް އީރާނުން މިއަދު ބުނެފިއެވެ. އީރާނުން ބުނީ އިތުރު ކަމެއް ނުކުރާހާ ހިނދަކު ހަމަލާއެއް ނުދޭނެ ކަމަށެވެ. ނަަމަވެސް އީރާނުން މިހެން ބުނެފަައިވާއިރު، އިސްރާއީލާއި އެމެރިކާއިން ވަނީ އީރާނުން ދިން ހަމަލާގެ  ޖަވާބު ދޭނެ ކަމަށް ބުނެފައިވެއެވެ. މިއާއެކު ބޮޑު ހަނގުރާމައަކަށް ވެގެން ހިނގައިދާނެ ކަމުގެ ބިރުވެރިކަން އިތުރުވެފައިވެއެވެ.

އެކްސިއޮސް ނިއުސްއިން އިސްރާއީލުގެ އޮފިޝަލުންނަށް ހަވާލާދީ ރިޕޯޓުކޮށްފައިވާ ގޮތުގައި، އިސްރާއީލުން "ވަރުގަދަ ޖަވާބެއް" ދޭނެއެވެ. މި ހަމަލާ އީރާނުގެ ތެޔޮ އުފައްދާ ތަންތަނާއި އެހެނިހެން މުހިންމު ތަންތަނަށް އަމާޒުކޮށްފާނެއެވެ. 

އިރާނުގެ އަސްކަރިއްޔާ އިން ބުނީ މި ހަމަލާއަކީ އީރާންގެ މަދަދު ލިބޭ، ލުބްނާންގެ ހިޒްބުﷲ ޖަމާއަތުގެ ލީޑަރު ހަސަން ނަސްރުﷲ އާއި ހަމާސް ޖަމާއަތުގެ ވެރިޔާ އިސްމާއިލް ހަނިއްޔާ އަވަހާރަކޮށްލުމުގެ ބަދަލުގައި ދިން ހަމަލާއެއް ކަމަށެވެ. އިރާނުން ދިން ވައިގެ ހަމަލާތަކުގެ ވަރުގަދަ ރައްދެއް ދޭނެ ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ ދީފަ އެވެ.