ކުޑަކުއްޖަކަށް އަނިޔާކޮށް ބްލެކްމެއިލްކުރި މައްސަލައެއް ފުލުހުން ބަލަން ފަށައިފި

ކުޑަކުއްޖަކު ގޭގައި ނިދާފައި އޮއްވާ ގަދަކަމުން ގެއިން ނެރެ  ބަރަހަނާކޮށް، ތަޅައި އަނިޔާކުރާ ތަން ވިޑިއޯ ކުރުމަށް ފަހު، އެ ވީޑިއޯ އާއްމުކުރާނެ ކަމަށް ބުނެ ބިރުދެއްކި މައްސަލައެއް ފުލުހުން ބަލަން ފަށައިފި އެވެ.

ފުލުހުން ބުނީ ސޯޝަލް މީޑިއާ މެދުވެރިކޮށް ފުލުހުންގެ ސަމާލުކަމަށް މިމައްސަލަ އައިސްފައިވާކަމަށެވެ. އެހެން ކަމުން ކަމާގުުޅުންހުރި އިދާރާތައް މެދުވެރިކޮށް މައްސަލައާއި ގުޅުންހުރި މަޢުލޫމާތު ހޯދުމުގެ މަސައްކަތް ކުރަމުންދާ ކަަމަށް ފުލުހުން ބުނެފައިވެއެވެ. 

މައްސަލަ ފެންމަތިވެފައި ވަނީ އެ ކުއްޖާގެ މަންމަ ފޭސްބުކްގައި ކުރި ޕޯސްޓަކަށް ފަހުއެވެ. ކުއްޖާގެ މަންމަ ބުނެފައިވަނީ ދުވަސްކޮޅެއް ކުރިން މިސްކިތެއްގެ ތެރޭގައި ކުޑަ ކުއްޖަކަށް ބުލީކޮށް އަނިޔާކުރާ މަންޒަރު ފެންނަ ވީޑިއޯއެއް އާންމުވުމާ އެކު އެންމެންގެ ލޭ ކައްކުވާލި ކަމަށާއި މިފަހަރު އެފަދަ ކަމެއް ދިމާވީ އޭނާގެ ދަރިފުޅަށް ކަމަށެވެ.

އޭނާ ބުނި ގޮތުގައި ދަރިފުޅަށް އަނިޔާދިނީ ގޭގައި ނިދާފައި އޮއްވައި، ކުޑަދޮރުން ކޮޓަރީގެ ތެރެއަށް ވަދެ، އެ ކުއްޖާއަށް ބިރު ދައްކައިގެން ގެންދިއުމަށް ފަހު އެވެ. އެގޮތުން ބޭރަށް ނުގޮސްފިނަމަ، މަރާލާނެ ކަމުގެ އިންޒާރުދީގެން ކުއްޖާ ބޭރަށް ގެންދިއުމަށް ފަހު ބަރަހަނާކޮށް، އަނިޔާ ކޮށްފައިވާކަމަށެވެ. އަދި އެމަންޒަރު ވީޑިއޯކޮށް، ފައިސާ ނުދީފިނަމަ ލީކު ކޮށްލާނެ ކަމުގެ ބިރުދައްކާފައިވާކަމަށް އެކުއްޖާގެ މަންމަ ބުނެފައި ވެއެވެ.

ފޭސްބުކްގައި ކުރި ޕޯސްޓާއި އެކު، ކުއްޖާއަށް އެ މީހުން ފޮނުވާފައިވާ މެސެޖުތަކުގެ ސްކްރީންޝޮޓް ތަކެއް އާންމުކޮށްފައިވެއެވެ. އެ ސްކްރީންޝޮޓް ތަކުގައި ބޭއަދަބީ ބަސްތައް ބޭނުންކޮށްފައިިވާއިރު، ފައިސާ ދިނުމަށާއި މަރުގެ އިންޒާރުތައް ދީފައިވެއެވެ.

ކުއްޖާގެ މަންމަ ބުނީ އެއް އުމުރުފުރައެއްގެ ގިނަ ކުދިން ތިބި އިންސްޓަގްރާމް ގްރޫޕެއްގައި ކުއްޖާގެ ވީޑިއޯ އާންމުކޮށް، މަރުގެ އިންޒާރުދީފައިވާ ކަމަށެވެ. މިއަށް ވުރެ ވަކި ސީރިއަސް ކްރައިމެއް ކޮބައިތޯއާއި މިއީ ގްރޭޑް 9 ގައި އުޅޭ ކުއްޖަކު އިސްވެ ހުރެ ގްރޫޕަކުން ހިންގި އަމަލެއްވީމަ އޮންނާނީ އޭނާގެ ހައްގު ކަމުގައި ކުއްޖާގެ މަންމަ ލިޔެފައި ވެއެވެ. އަދި އޭނާގެ ދަރިފުޅަށް އިންސާފު ހޯދައިދޭނީ ކިހިނެއްތޯއާއި މެދު ސުވާލު އުފައްދާފައިވެއެވެ. 

މި ކުއްޖާއަކީ ލ.ގަމު ސްކޫލެއްގައި ކިޔަވަމުންދާ ދަރިވަރެއްކަމަށް މަޢުލޫމާތުލިބެއެވެ. އަދި ކުއްޖާއަށް އަނިޔާކޮށް ބިރުދައްކާފައިވަނީވެސް އެ ސްކޫލުގެ ދަރިވަރުން ކަމަަށްވެއެވެ. މަޢުލޫމާތު ލިބިފައިވާ ގޮތުގައި އެކުއްޖާގެ މަންމައަކީ އެ  ސްކޫލުގައި ޓީޗަރެއްގެ ވަޒީފާ އަދާކުރަމުންދާ މީހެކެވެ.