ވޭޕް މަނާކުރުމަށް ރާއްޖޭގެ ކުޅިވަރު ޖަމުޢިއްޔާތަކުން ގޮވައިލައިފި!

ވޭޕާއި އީ-ސިނގިރޭޓު މަނާ ކޮށްދިނުމަށް ދިވެހިރާއްޖޭގެ ކުޅިވަރު ޖަމުޢިއްޔާތަކުން ގޮވައިލައިފިއެވެ. 

ޤައުމީ ކުޅިވަރުގެ 21 ޖަމްޢިއްޔާއެކުވެގެން ނެރުނު ބަޔާނެއްގައި ބުނެފައިވަނީ ވޭޕް އަދި އީ-ސިނގިރޭޓްގެ ބޭނުންކުރާ މީހުންގެ އަދަދު އިތުރުވެ އޭގެ ނޭދެވޭ އަސަރު ކުރިއަށް އޮތް ޖީލުތަކަށް ކޮށްފާނެކަމުގެ ބިރު އިންތިހާއަށް އުފެދިފައިވާކަމަށެވެ.

ދިވެހި ކުޅުންތެރިންނާއި ތަމްރީނުދޭ މީހުންގެ މެދުގައި ވޭޕް އަދި އީ-ސިނގިރޭޓް ބޭނުންކުރާ މިންވަރު އަންނަނީ ކަންބޮޑުވާ މިންވަރަކަށް އިތުރުވަމުން ކަމަށާއި އޭގެ ނުރައްކާ ވެސް އިތުރުވަމުން އަންނަކަމަށް ޖަމުޢިއްޔާތަކުން ފާހަގަކުރިއެވެ.

 އެކަމުގެ ސަބަބުން ކުޅުންތެރިންގެ ފުއްޕާމެއަށް ދިމާވާ ޞިއްޙީ އެކި އެކި މައްސަލަތަކާއި، ނޭދެވޭ އަސަރުތަކުގެ ސަބަބުން ކުޅުންތެރިންގެ ކުޅުން ދަށްވެ ކުރިއެރުމަށް ހުރަސްއެޅި ދުޅަހެޔޮކަން ގެއްލި ކުޅިވަރު ކުޅުމާ ދުރަށްދާކަން ފާހަގަކުރެވެމުންދާ ކަމަށް ބަޔާނުގައިވެއެވެ.

އެކަމަކީ ދިވެހިރާއްޖޭގެ ކުޅިވަރާއި ދުޅަހެޔޮކަން ޕްރޮމޯޓް ކުރުމަށް ސަރުކާރުންނާއި މަދަނީ ފަރާތްތަކުން ކުރާ މަސައްކަތަށް ހުރި ބޮޑު ގޮންޖެހުމެއްކަން ފާހަގަކޮށް ޤައުމީ ކުޅިވަރުގެ ޖަމުޢިއްޔާތަކުން ބުނީ އެކަން ވެފައިވަނީ ބައިނަލްއަޤްވާމީ ކުޅިވަރުގެ މައިދާނުގައި ދެކެން ބޭނުންވާ ރަން ވަނަތައް ހާސިލްކުރުމަށް އެޅިފައިވާ ހުރަހަކަށް ކަމަށެވެ.

އެހެންކަމުން ކުރިއަށް އޮތް ޖީލު އެ ވަބާއިން ސަލާމަތް ކުރުމަށްޓަކައި ވޭޕް އަދި އީ-ސިނގިރޭޓް ރާއްޖެ އެތެރެކުރުމާއި ވިޔަފާރި ކުރުމާއި އަދި އެތަކެތި ގެންގުޅުން މަނާކުރުމަށް ވަނީ ގޮވާލާފައެވެ. އަދި ވޭޕް އަދި އީ-ސިނގިރޭޓް ބޭނުންކުރުމަކީ ޤައުމީ ހައްސާސް މައްސަލައެއްގެ ގޮތުގައި ބަލައިގެނެ އަވަހަށް ފިޔަވަޅު އެޅުމަށްވެސް ޤައުމީ ކުޅިވަރު ޖަމުޢިއްޔާތަކުން ވަނީ އެދިފައެވެ.