ހުޅުމާލޭ ދެވަނަ ފިޔަވަހިން ސިނާއީ ބޭނުމަށް ބިން ވިއްކަނީ

ހުޅުމާލެ ދެވަނަ ފިޔަވަހިން ސިނާއީ ބޭނުމަށް ބީލަމުގެ އުސޫލުން ބިން ވިއްކަން ހައުސިންގ ޑިވެލޮޕްމަންޓް ކޯޕަރޭޝަން (އެޗް.ޑީ.ސީ)ން ހުޅުވާލައިފިއެވެ.

ހުޅުމާލޭ ދެވަނަ ފިޔަވަހިން ވިއްކުމަށް ހަމަޖެހިފައިވަނީ 3,689 އަކަފޫޓާއި 3,746 އަކަފޫޓާ ދެމެދުގެ 12 ބިމެކެވެ.  ބީލަމުގެ އުސޫލުން ބިން ވިއްކުމަށް ހަމަޖެހިފައިވަނީ ހުޅުމާލެ ފޭސް 2 ގެ "އިންޓަގްރޭޓަޑް ހަބް" ގެ ގޮތުގައި ތަރައްޤީ ކުރުމަށް ކަނޑައަޅާފައިވާ ސަރަހައްދުންނެވެ. ބީލަން ފެށޭ އަގަކީ އަކަފޫޓަކަށް 7،500 ރުފިޔާއެވެ. އަދި ބީލަމުގެ އުސޫލުން ބިން ވިއްކާނީ އުމުރުން 18 އަހަރު ފުރިފައިވާ ދިވެހި ރައްޔިތުންނަށާއި ރާއްޖޭގައި ރަޖިސްޓްރީ ކޮށްފައިވާ 100 އިންސައްތަ ދިވެހިންގެ ހިއްސާ އޮންނަ ކުންފުންޏަކަށެވެ.

އެޗްޑީސީން ވިދާޅުވީ ބިން ވިއްކުން ކުރިއަށް ގެންދަނީ ދެ މަރުހަލާ އަކަށް ބަހާލައިގެން ކަމަށެވެ. އެއީ އީއޯއައި ހުށަހެޅުމާއި އެއް ފަރާތަށްވުރެ ގިނަ ފަރާތުން ހުށަހަޅާފައިވާ ބިމަކަށް ބިޑް ކޮށްގެން ކަމަށް އެޗްޑީސީން ވިދާޅުވެއެވެ.

އެޗް.ޑީ.ސީއިން ވިދާޅުވީ އޮންލައިންކޮށް އެޕްލައިކުރެވޭގޮތަށް ހުޅުވާލާފައިވާ ބިޑް ޕޯޓަލް (https://bids.hdc.mv/) ގައި ރަޖިސްޓްރީވެގެން ބިން ގަތުމަށް އެޕްލިކޭޝަން ހުށަހެޅުމުގެ ފުރުޞަތު އޮންނާނެ ކަމުގައެވެ.