ޚަބަރު
ފަތުރުވެރިކަމުގެ ބިންގަލަކީ މިތުރުވެރިކަން: ރައީސް މުޢިއްޒު
ރައީސް ޑރ.މުއިޒް އެކްސްގައި ކުރެއްވި ޕޯސްޓް
ހުލާސާ
2024 ވަނަ އަހަރުގެ ޤައުމީ ފަތުރުވެރިކަމުގެ ދުވަހުގެ މުނާސަބަތުގައި ރައީސް ޑރ.މުޙައްމަދު މުޢިއްޒް ތަހުނިއްޔާ ފޮނުއްވައިފިއެވެ. މި ދުވަހާ ގުޅޭ ގޮތުން އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، ފަތުރުވެރިކަމުގެ ބިންގަލަކީ މިތުރުވެރިކަންކަމެވެ. އަދި އެކުވެރިކަމާއި ހިތްހެޔޮކަމާއި އަމާންކަމާއި ރައްކާތެރިކަންކަމެވެ. އަދި ރާއްޖޭގެ ފަތުރުވެރިކަން ކާމިޔާބުކަމާއިއެކު ދެމެހެއްޓުމުގައި ދިވެހީންގެ ޞުލްޙަވެރި އޮމާން ދިވެހި ގޮތްތައް ހިފެހެއްޓުމަކީ ނުހަނު ބޭނުންތެރިކަމެއްކަމުގައި ރައީސް ފާހަގަކުރެއްވިއެވެ.
— Dr Mohamed Muizzu (@MMuizzu) October 3, 2024
މި އަހަރުގެ ފަތުރުވެރިކަމުގެ ދުވަސް ފާހަގަ ކުރުމުގެ ގޮތުން މިނިސްޓްރީ އޮފް ޓުއަރިޒަމް އާއި މޯލްޑިވްސް އެސޯސިއޭޝަން އޮފް ޓުއަރިޒަމް އިންޑަސްޓްރީ (MATI) އިން ގުޅިގެން ރީތި ރާއްޖެ ނެޝަނަލް ކެމްޕެއިން އިފްތިތާހު ކުރުމަށް ވަނީ ހަމަޖެހިފައެވެ. އަދި މީގެ އިތުރުން މިނިސްޓްރީ އޮފް ޓޫރިޒަމްގެ ވެބްސައިޓުގައި ސްޓޫޑެންޓް ރިސޯސަސް ސެގްމެންޓް ލޯންޗުކުރުމަށް ވަނީ ހަމަޖެހިފައެވެ.
މި އަހަރު ރާއްޖެއަށް ޒިޔާރަތްކޮށްފައިވާ ފަތުރުވެރިންގެ އަދަދަކީ 1،482،057 އެވެ. މީގެ ތެރެއިން %14.7 ފަތުރުވެރިން ޗައިނާއިން އައިސްފައިވާއިރު %10.9 އަކީ ރަޝިޔާގެ ފަތުރުވެރިންނެވެ. މީގެ އިތުރުންވެސް ޔޫކޭ، އިޓަލީ، އިންޑިއާ، ޖަރުމަން، ޔޫ.އެސް.އޭ، ފްރާންސް، ސްޕެއިން އަދި ސްވިޒަލޭންޑުން ވެސް ގިނަ ފަތުރުވެރިންވަނީ ރާއްޖެއަށް ޒިޔާރަތް ކޮށްފައެވެ.
2024 ވަނަ އަހަރުގެ ރިޔާސީ ބަޔާނުގައި ސަރުކާރުގެ އަމާޒަކީ ޓޫރިޒަމްގެ ޚިދުމަތް ރާއްޖޭގައި ފުޅާކުރުން ކަމުގައި ރައީސް ޑރ. މުޙައްމަދު މުޢިއްޒް ވަނީ އަލިއަޅުވާލައްވާފައެވެ. ފަތުރުވެރިކަމާ ބެހޭ ވުޒާރާއިން ބުނާ ގޮތުގައި މި އަހަރު ސަރުކާރުގެ އަމާޒަކީ ރާއްޖެއަށް ދެ މިލިޔަން ފަތުރުވެރިން ގެނައުމެވެ. އެ އަމާޒު މިއަހަރުގެ ޑިސެންބަރުގައި ހާސިލް ކުރެވޭނެ ކަމަށް ސަރުކާރުން އަންދާސާ ކުރެއެވެ.
