އެމްއެމްއޭ އިން މަނީ ޗޭންޖިންގ ލައިސަންސް ދޫކުރުމަށް އައު ގަވާއިދެއް ތަޢާރަފުކޮށްފި

 މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން "މަނީ ޗޭންޖިންގ ވިޔަފާރިއާ ބެހޭ ގަވާއިދު" ގެ ނަމުގައި އައު ގަވާއިދެއް ތަޢާރަފުކޮށްފިއެވެ. މި އައު ގަވާއިދުގެ ދަށުން، އެމްއެމްއޭ އިން ދޫކުރާނީ ދެ ބާވަތެއްގެ ލައިސަންސެވެ. އެއީ:

• ޓިއަރ 1 މަނީ ޗޭންޖިންގ ލައިސަންސް: މިއީ ބޭރު ފައިސާ ގަތުމާއި ވިއްކުމުގެ ވިޔަފާރިކުރުމުގެ ލައިސަންސެކެވެ. މި ލައިސަންސް ދޫކުރެވޭނީ ކުންފުނީގެ ޤާނޫނުގެ ދަށުން، މި ވިޔަފާރިއަށް ޚާއްޞަކޮށް އުފައްދާފައިވާ ކުންފުނިތަކަށެވެ.
• ޓިއަރ 2 މަނީ ޗޭންޖިންގ ލައިސަންސް: މިއީ ހަމައެކަނި ބޭރު ފައިސާ ވިއްކުމުގެ ވިޔަފާރިކުރުމުގެ ލައިސަންސެކެވެ. މި ލައިސަންސް ދޫކުރެވޭނީ ޓޫރިޒަމާބެހޭ ޤާނޫނުގެ ދަށުން ޓޫރިސްޓް ރިޒޯޓް ހިންގުމުގެ ހުއްދަ ލިބިފައިވާ ކުންފުނިތަކަށެވެ.

މި ގަވާއިދަށް ޢަމަލުކުރަން ފެށުމާއެކު، މިހާރު ލައިސަންސް ލިބިފައިވާ ފަރާތްތަކުން 2 މަސްދުވަހުގެ ތެރޭގައި އައު ލައިސަންސަށް އެދި ހުށަހަޅަންޖެހޭނެއެވެ. މި މުއްދަތުގެ ތެރޭގައި ހުށަނާޅާ ފަރާތްތަކުގެ މިހާރުގެ ލައިސަންސް ބާޠިލުވާނެ ކަމަށް އެމްއެމްއޭ އިން ކުރި އިއުލާނުގައި ވަނީ ފާހަގަކޮށްފައެވެ.

އަލަށް ލައިސަންސް ދޫކުރުމަށް ހަމަޖެހިފައިވަނީ ޖުމުލަ 50 ފަރާތަށްކަމަށާއި މި އަދަދަށްވުރެ އިތުރަށް ހުށަހަޅާ ފަރާތްތަކުގެ ތެރެއިން ލައިސަންސް ދޭނެ ފަރާތްތައް ކަނޑައަޅާނީ ގުރުއަތުލައިގެންނެވެ. އަލަށް ލައިސަންސަށް އެދި ހުށަހެޅުމުގެ އެންމެ ފަހުގެ ތާރީޚަކީ 30 ނޮވެންބަރު 2024 އެވެ.