މާލޭގެ އާސަހަރާ މިސްކިތާއި ހިނަވާގެ ރައީސުލްޖުމްހޫރިއްޔާ ހުޅުއްވައި ދެއްވައިފި

މަރާމަތަށް  ބަންދުކޮށްފައި ހުރި މާލޭގެ އާސަހަރާ މިސްކިތާއި ހިނަވާގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުޅުއްވައިދެއްވައިފިއެވެ.

މިއަދު ހުކުރު ނަމާދުގެ ކުރިން ބޭއްވި ރަސްމިއްޔާތުގައި މިސްކިތް ހުޅުއްވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި މާލެ ސިޓީ ކައުންސިލްގެ މޭޔަރ އާދަމް އާޒިމެވެ.

ހިނަވާގެ އަލުން ހުޅުވިގެންދާއިރު އެތަނުގައި ހިނަވާ ކޮޓަރި އިތުރުކޮށް މައްޔިތާއަށް ޒިޔާރަތްކުރާ މީހުން މަޑުކޮށްލައިގެން ތިބުމަށްވެސް އޭސީކޮށްފައިވާ ޚާއްސަ ސަރަޙައްދެއް ހަދާފައިވެއެވެ. އަދި އަންހެނުންނަށް ނަމާދުކުރެވޭނެ އިންތިޒާމް އިމާރާތުގެ ދެ ފަންގިފިލާގައިވެސް ޤާއިމުކޮށްފައިވެއެވެ.

މަރާމާތަށްފަހު މިއަދު ހުޅުވިގެންދިޔަ އާސަހަރާ މިސްކިތުގެ ޖާގަ ދެގުނަ ބޮޑުކޮށް، ދެ ފަންގިފިލާ އޭސީކޮށް ނާމާދުކުރެވޭގޮތަށް ވަނީ ހަދާފައެވެ. ޚާއްސަ އެހީއަށް ބޭނުންވާ މީހުންގެ ޚާއްސަ ފާހާނާއާއި އާންމުންނަށް ޚާއްސަ ފާހާނާ ހުންނާނެއެވެ. އަދި ކުރިން ދެ ކޮޓަރިހުރިނަމަވެސް، މައްޔިތާ ހިނެވުމަށް ޚާއްސަ 3 ކޮޓަރި ވަނީ ތައްޔާރު ކުރެވިފައެވެ. ހިނަވާ ގޭގައި ތަނުގެ މުވައްޒަފުންނާއި ޖަމާތްތެރިންނަށް ތިބެވޭނެ ކޮޓަރިއެއް ވަނީ ހަދާފައެވެ.

މާލޭގެ އާސަރާގެ މިސްކިތާއި ހިނަވާގެ މަރާމަތު ކުރުމުގެ މަސައްކަތް ފަށާއިފަވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލެ ސިޓީ ކައުންސިލްގެ މޭޔަރުކަމުގެ މަޤާމުގައި ހުންނެވިއިރުއެވެ.

މި ރަސްމިއްޔާތުގައި ވާހަކަ ދައްކަވަމުން މާލޭ ސިޓީ ކައުންސިލްގެ ޑެޕިއުޓީ މޭޔަރ އަޙުމަދު ނަރީޝް ވިދާޅުވީ މިއަދުން ފެށިގެން މާލޭގެ އާސަހަރާގައި ކަށުކަމާކެމީގެ ކަންކަމާއި ވަޅުލުމުގެ ކަންކަން ކުރިއަށްދާނެ ކަމަށެވެ. އަދި މި މަސައްކަތަކީ  ރައީސް ފެއްޓެވި މަސައްކަތެއް ކަމަށާއި މިހާރުގެ މޭޔަރ މި މަސައްކަތް ނިންމެވީ ޚާއްޞަ އިސްކަމެއް ދެއްވައިގެން ކަމަށެވެ. 

އެތަން ހުޅުއްވައިދެއްވާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މިސްކިތް ބައްލަވާލައްވާފައެވެ.