މިހާތަނަށް ނުރައްކާތެރި ކެމިކަލް ގުދަންކުރާ 31 ގުދަނާ 24 ފިހާރަ ބަލައި ފާސްކުރެވިއްޖެ- ޑިފެންސް މިނިސްޓްރީ

ތިން ދުވަހުގެ ތެރޭގައި  މީހުން ދިރިއުޅޭ 347 އިމާރާތާއި، ނުރައްކާތެރި ކެމިކަލް ގުދަންކުރާ 31 ގުދަނާ ކެމިކަލް ވިއްކާ 24 ފިހާރަ ބަލައި މަޢުލޫމާތު އެއްކޮށްފައިވާ ކަމަށް މިނިސްޓްރީ އޮފް ޑިފެންސްއިން ވިދާޅުވެއްޖެއެވެ.

ޑިފެންސް މިނިސްޓްރީން މިހެން ވިދާޅުވީ ނުރައްކާތެރި ކެމިކަލާބެހޭ ގަވާއިދުގައި ބަޔާންކޮށްފައިވާ މިންގަނޑަށް ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހުރިތޯ ބެލުމަށް ހިންގާ "އޮޕަރޭޝަން ހިރާސް ފާސް" ގެ އަދާހަމަ ގެނެސްދެއްވަމުންނެވެ.

މި އޮޕަރޭޝަންގެ ފުރަތަމަ ތިން ދުވަހުގެ މަތިން، އިންސްޕެކްޝަން ޓީމްތަކުން ވަނީ، ޖުމުލަ 402 ތަނެއް ބަލައި އެތަންތަނުގެ މަޢުލޫމާތު އެއްކޮށްފައެވެ. އެ މިނިސްޓްރީންް ވިދާޅުވީ އޮކްޓޯބަރ މަހުގެ 1 ން 15 އަށް ކުރިއަށްގެންދިއުމަށް ހަމަޖެހިފައިވާ މި އޮޕަރޭޝަންގައި ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހިންގަނީ ގަވާއިދާ އެއްގޮތަށްތޯ ބެލުމުގެ އިތުރުން، ގްރޭޓަރ މާލެ އޭރިއާގައި ފަސޭހައިން އަލިފާންރޯވާ ފަދަ ތަންތަނާއި އެ ތަންތަނުގައި ހުރި ހިރާސްތައް ވެސް މި އޮޕަރޭޝަންގެ ތެރެއިން ދެނެގަންނާނެ ކަމަށެވެ.

މާލޭގައި ކުރިއަށްދާ މި އޮޕަރޭޝަންގައި އެމްއެންޑީއެފްގެ އޮފިސަރުންގެ އިތުރުން ފުލުހުންގެ ޓީމެއް ވެސް ބައިވެރިވެ އެެވެ. މިނިސްޓްރީން އޮޕަރޭޝަނެއް ފަށާފައި މިވަނީ ކެމިކަލް ގެންގުޅުމާއި ގުދަންކުރުމުގައި ބައެއް މީހުން ގަވާއިދާ ހިލާފުވާ ކަމުގެ ޝަކުވާ ވެސް އެ މިނިސްޓްރީއަށް ލިބެމުންދަނިކޮށެވެ. އެއްވެސް ބާވަތެއްގެ ކެމިކަލެއް މާލޭގެ އެއްވެސް ތަނެއްގައި ގުދަންކުރުމަކީ މިހާރު މަނާ ކަމެކެވެ. އެކަމަށް ސަރުކާރުން ވަނީ ހުޅުމާލެއިން ބިން ހަމަޖައްސައިފަ އެވެ.