ބިދޭސީއަކު ގެއްލިގެން ކުރާ ރިކުއެސްޓަކަށް 1،000 ރުފިޔާގެ ފީއެއް، ރިކުއެސްޓް އަނބުރާ ގެންދާނަމަ 10،000 ރުފިޔާ!

ރާއްޖޭގައި ވަޒީފާ އަދާކުރާ ބިދޭސީން ފިލައިގެން އުޅޭ މައްސަލައަށް ހަރުދަނާ ފިޔަވަޅު އެޅުމަށް އައު އުޞޫލުތަކެއް އާއްމުކޮށްފިއެވެ.

ދާޚިލީ ސަލާމަތާއި ފަންނިއްޔަތާ ބެހޭ ވުޒާރާއިން ނެރެފައިވާ އިޢުލާނުގައި ވަނީ "ދިވެހިރާއްޖޭގައި ބިދޭސީން ވަޒީފާއަދާކުރުމާބެހޭ ޤަވާއިދު" ގެ ދަށުން އެކުލަވާލާފައިވާ ދިވެހިރާއްޖޭގެ ވަޒީފާ އަދާކުރާ ބިދޭސީ ފަރާތެއް ފިލައިފިނަމަ ނުވަތަ ގެއްލިއްޖެނަމަ ޢަމަލުކުރާނެގޮތުގެ އޫޞޫލަށް މިމަހުގެ 6 ވަނަ ދުވަހުން ފެށިގެން ޢަމަލުކުރަން ފަށާނެކަމަށެވެ. 

އެގޮތުން ބިދޭސީއަކު ގެއްލިގެން ރިޕޯޓް ކުރާ ކޮންމެ ރިކުއެސްޓަކަށް "މިސިންގ ރިޕޯޓިންގ ފީ" ގެ ގޮތުގައި 1،000 ރުފިޔާގެ ސަރވިސް ފީއެއް ނެގޭނެއެވެ. އަދި އަދި ވަޒީފާ ދޭ ފަރާތުގެ އިހުމާލުން ވަރކް ޕަރމިޓް ހުއްދައިގެ ދަށުން ރާއްޖޭގައި ވަޒީފާ އަދާކުރާ ބިދޭސީއަކު ފިލައިފިނަމަ ނުވަތަ ގެއްލިއްޖެނަމަ "ވަރކް ޕަރމިޓް ނެގްލިޖެންސް ފައިން" ގެ ގޮތުގައި 2،000 ރުފިޔާގެ ފީއެއް ނެގޭނެއެވެ. ހަމައެހެންމެ ބިދޭސީއަކު ގެއްލިގެން ރިޕޯޓްކުރާ މައްސަލައެއް އަނބުރާ ނަގާނަމަ "ވަރކް ޕަރމިޓް މިސިންގ ވިތުޑްރޯވަލް ސަރވިސް ފީ" ގެ ގޮތުގައި 10،000 ރުފިޔާ ނެގުމަށް ވަނީ ހަމަޖެހިފައެވެ. ދާޚިލީ ސަލާމަތާބެހޭ ވުޒާރާއިން ވިދާޅުވީ، ރާއްޖޭގައި ވަޒީފާ އަދާކުރާ ބިދޭސީ ފަރާތެއް ފިލައިގެން ނުވަތަ ގެއްލިގެން މިސިންގ ރިޕޯޓުކޮށްފައިވާ ރިކުއެސްޓް އެކްސްޕެޓް ސިސްޓަމް މެދުވެރިކޮށް އަނބުރާ ގެންދިއުމުގެ ފުރުޞަތު މިމަހުގެ 6 ވަނަ ދުވަހުން ފެށިގެން ހުޅުވާލެވޭނެކަމަށެވެ. 

ހަމައެއާއެކު މިމަހުގެ 6 ވަނަ ދުވަހުން ފެށިގެން 30 ދުވަހުގެ ތެރޭގައި މިސިންގ ރިކުއެސްޓް އަނބުރާ ގެންދަންވާނެކަމަށެވެ. އަދި މި އެ މުއްދަތު ހަމަވުމަށްފަހު ރިކުއެސްޓް އަނބުރާ ގެންދިއުމަށް ވަޒީފާދޭ ފަރާތުން ހުށަހަޅައިފިނަމަ 10،000 ރުފިޔާގެ ސަރވިސް ފީއެއް ދައްކަން ޖެހޭނެކަމަށްވެސް އިޢުލާނުގައި ވެއެވެ.

ދާޚިލީ ސަލާމަތާއި ފަންނިއްޔަތާ ބެހޭ ވުޒާރާގެ އިޢުލާނުގައި ވާގޮތުން މިމަހުގެ 6 ވަނަ ދުވަހުގެ ފަހުން ގެއްލިގެން ރިޕޯޓްކުރާ ބިދޭސީންގެ މައްސަލަތަކުގައި، ރިޕޯޓްކުރާ ދުވަހުން ފެށިގެން 7 ދުވަހުގެ ތެރޭގައި ރިކުއެސްޓް އަނބުރާ ގެންދަންވާނެކަމަށާއި މި މުއްދަތު ހަމަވުމަށްފަހު ރިކުއެސްޓް އަނބުރާ ގެންދަން އެދޭނަމަ، 10،000 ރުފިޔާގެ ސަރވިސް ފީއެއް ނެގޭނެއެވެ.

އެވުޒާރާއިން ވިދާޅުވީ، އުޞޫލަށް ގެނެވުނު ބަދަލުތަކާގުޅޭ މަޢުލޫމާތު ހިމެނޭ ޔޫޒަރ ގައިޑްތައް އެކްސްޕެޓް ސިސްޓަމްގެ ހޯމްޕޭޖުން މިމަހުގެ 6 އިން ފެށިގެން ފެންނަން ހުންނާނެ ކަމަށެވެ.

ރާއްޖޭގައި ޤަވައިދާ ޚިލާފަށް އުޅެމުންދާ ބިދޭސީން ހޯދާ، އެމީހުންނަށް ފިޔަަވަޅު އެޅުމަށް ސަރިކާރުން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން އެކަމަށްޓަކައި ޚާއްޞަ އޮޕަރޭޝަނެއް ފަށައި، ބިދޭސީން ޤަވައިދުގެ ތެރެއަށް ވެއްދުމުގެ މަސައްކަތްވެސް ދަނީ ކުރަމުންނެވެ. އަދި ގިނަ ޢަދަދެއްގެ ބިދޭސީން ވަނީ ޑީޕޯޓްވެސް ކޮށްފައެެވެ.