ދިވެހިރާއްޖެ އިސްލާމްވިތާ 900 އަހަރު ފުރުން ކުލަގަދަކޮށް ފާހަގަކުރެއްވުމަށް ރައީސް ޑރ.މުޢިއްޒު ނިންމަވައިފި

ދިވެހިރާއްޖެ އިސްލާމްވިތާ 900 އަހަރު ފުރުން، ކުލަގަދަކޮށް ފާހަގަކުރުމަށް ސަރުކާރުން ނިންމައިފިއެވެ. މިކަން އިއުލާނުކުރެއްވީ ދިވެހި ލެންގުއޭޖް، ކަލްޗަރ އެންޑް ހެރިޓޭޖްގެ ވަޒީރު އާދަމް ނަޞީރު އިބްރާހިމްއެވެ.

ދައުލަތުގެ މީޑިއާ، ޕީއެސްއެމްނިއުސްގެ "ރާއްޖެ މިއަދު" ޕްރޮގްރާމުގައި ވާހަކަފުޅު ދައްކަވަމުން ވަޒީރު ވިދާޅުވީ، މި މުހިންމު މުނާސަބަތު ކުލަގަދަކޮށް ފާހަގަކުރުމަށް ރައީސުލްޖުމްހޫރިއްޔާ ނިންމަވާފައިވާ ކަމަށެވެ. އަދި މި މުނާސަބަތު ފާހަގަކުރުމުގެ ކައުންޓްޑައުން މިހާރު ފަށާފައިވާ ކަމަށްވެސް އެމަނިކުފާނު ވިދާޅުވިއެވެ.

ރާއްޖެ އިސްލާމްވިތާ 900 އަހަރު ފުރޭނީ 2026 ވަނަ އަހަރުއެވެ. މިއީ ދިވެހިންގެ ތާރީޚުގައި ވަރަށް މުހިންމު އަހަރެއް ކަމަށް ވަޒީރު ފާހަގަކުރެއްވިއެވެ. އަދި މީގެ ފަހުން އޮންނާނީ ހާސް އަހަރު ފުރުމަށް ކުރާ ދަތުރު ކަމަށްވެސް އެމަނިކުފާނު ވިދާޅުވިއެވެ.

ދިވެހިރާއްޖެ އިސްލާމްވުމަކީ ޤައުމުގެ ތާރީޚުގައި ފާހަގަކޮށްލެވޭ އެންމެ މުހިންމު ހާދިސާތަކުގެ ތެރެއިން އެއް ހާދިސާއެވެ. ތާރީޚީ ގޮތުން ޤަބޫލުކުރެވޭ ގޮތުގައި ރާއްޖެ އިސްލާމްވެފައިވަނީ ހިޖުރައިން 548 ވަނަ އަހަރު (މީލާދީން 1153 ވަނަ އަހަރު) ގައެވެ. އަޅުގަނޑުމެންގެ އާދަކާދައިގެ ތެރޭގައި ވާރިދުވެފައިވާ ގޮތުގައި، އުތުރު އެފްރިކާގެ އިސްލާމީ ޢިލްމުވެރިއެއް ކަމުގައިވާ އަބޫ އަލް ބަރަކާތު ޔޫސުފް އަލް ބަރްބަރީ އަކީ މި އިސްލާމްވުމުގެ މަސައްކަތުގައި އިސް ދައުރެއް އަދާކުރެއްވި ބޭކަލެކެވެ. އެ މަނިކުފާނު ދިވެހިރާއްޖެއަށް ވަޑައިގެން، އޭރުގެ ދިވެހި ރަދުން ކާމިޔާބުކަމާއެކު އިސްލާމްދީނަށް ވައްދަވައި، ޝަހާދަތް ކަލިމަ ވިދާޅުވުމަށް މަގުފަހިކޮށްދެއްވި ކަމަށް ރިވާވެގެން އައިސްފައިވެއެވެ.

ރަދުން އިސްލާމްވެވަޑައިގަތުމާއި ގުޅިގެން، ދިވެހި ރައްޔިތުން ތަދްރީޖީ ގޮތެއްގައި އިސްލާމްދީން ޤަބޫލުކުރަމުން ދިޔައެވެ. މި ގޮތުން އިސްލާމްދީން ޤައުމުގެ ނަމޫނާ އަދި ޙަޤީޤީ ދީނުގެ ގޮތުގައި ސާބިތުވެގެން ދިޔައެވެ. މި ތާރީޚީ ހާދިސާއަކީ އިސްލާމީ އުޞޫލުތަކާ އެއްގޮތަށް ދިވެހިރާއްޖޭގެ ޘަޤާފަތާއި، ޤާނޫނުތަކާއި، އަދި ދިރިއުޅުމުގެ ވައްޓަފާޅި އަލުން އެކުލަވާލައި، އާ ދައުރެއްގެ ފެށުމަށް މަގުފަހިކޮށްދިން މުހިންމު ބަދަލެކެވެ.

މި މުހިންމު މުނާސަބަތު ފާހަގަކުރުމުގެ ތައްޔާރީތައް މިހާރުވެސް ކުރިއަށްދާ ކަމަށް ވަޒީރު ވިދާޅުވިއެވެ. އަދި މި ފާހަގަކުރުންތަކުގެ ތަފްސީލު ކުރިއަށް އޮތް ދުވަސްތަކުގައި ހާމަކުރައްވާނެ ކަމަށްވެސް އެމަނިކުފާނު ވިދާޅުވިއެވެ.