ރައީސް ޑރ.މުއިއްޒު އިންޑިއާއަށް ތާރީޚީ ފުރަމާނަ ދަތުރުފުޅެއްގައި ފުރާވަޑައިގެންފި

ރައީސުލްޖުމްހޫރިއްޔާގެ ދެކަނބަލުން އިންޑިއާއަށް ކުރައްވާ ތާރީޚީ ފުރަމާނަ ދަތުރުފުޅެއްގައި މިއަދު ވެލާނާ އިންޓަރނޭޝަނަލް އެއަރޕޯޓުން ފުރާވަޑައިގެންފިއެވެ. މި ދަތުރުފުޅަކީ ރައީސް ޑރ. މުއިއްޒު ވެރިކަމާ ހަވާލުވެ ވަޑައިގެންނެވި ފަހުން އިންޑިއާއަށް ކުރައްވާ ފުރަތަމަ ރަސްމީ ދަތުރުފުޅެވެ.

ދަތުރުފުޅުގެ ތެރޭގައި ރައީސް މުއިއްޒު އިންޑިއާގެ ބޮޑުވަޒީރު ނަރެންދްރަ މޯދީއާ ބައައްދަލުކުރައްވާ، ދެ ޤައުމުގެ ދެމެދުގައި އޮތް ގުޅުން އިތުރަށް ހަރުދަނާކުރެއްވުމަށް މަޝްވަރާކުރައްވާނެ ކަމަށް ބެލެވެއެވެ. މީގެ އިތުރުން، އިޤްތިޞާދީ އަދި ވިޔަފާރީގެ ދާއިރާއިން ގިނަ އެއްބަސްވުންތަކެއްގައި ސޮއިކުރެއްވުމަށް ހަމަޖެހިފައިވާ ކަމަށް ރައީސް އޮފީހުން މަޢުލޫމާތު ދެއްވާފައިވެއެވެ.

އިންޑިއާގެ މިނިސްޓްރީ އޮފް އެކްސްޓަރނަލް އެފެއާޒުން ބުނެފައިވާ ގޮތުގައި، ރައީސް މުއިއްޒު އިންޑިއާގެ ރައީސް ދްރައުޕަދީ މުރުމުއާވެސް ބައްދަލުކުރައްވާނެއެވެ. އަދި ބައިލެޓަރަލް، ސަރަޙައްދީ އަދި ބައިނަލްއަޤްވާމީ ދެފަރާތުގެ މަޞްލަޙަތު ހިމެނޭ މައްސަލަތަކާ ގުޅޭގޮތުން ބޮޑުވަޒީރު މޯދީއާއެކު މަޝްވަރާކުރައްވާނެ ކަމަށްވެސް އެ މިނިސްޓްރީން ހާމަކޮށްފައިވެއެވެ.

ރައީސް މުއިއްޒު މުންބާއީ އަދި ބެންގަލޫރުއަށްވެސް ޒިޔާރަތްކުރައްވާ، އެތަންތާނގައި ވިޔަފާރީގެ ހަރަކާތްތަކުގައި ބައިވެރިވެވަޑައިގަންނަވާނެ ކަމަށް އިންޑިއާ ސަރުކާރުން ބުނެފައިވެއެވެ. އިންޑިއާއިން ފާހަގަކޮށްފައިވާ ގޮތުގޮތުގައި ދިވެހިރާއްޖެއަކީ އިންޑިއަން އޯޝަން ރީޖަންގައި އިންޑިއާގެ މުހިންމު ކަނޑުގެ އަވައްޓެރިއެކެވެ. އަދި ބޮޑުވަޒީރުގެ 'ސާގަރ' (ސެކިއުރިޓީ އެންޑް ގްރޯތް ފޯރ އޯލް އިން ދަ ރީޖަން) އަދި އިންޑިއާގެ 'ނޭބަރހުޑް ފަސްޓް ޕޮލިސީ' ގައި ޚާއްޞަ މަޤާމެއް ލިބިފައިވާ ޤައުމެކެވެ.

ސިޔާސީ ދާއިރާގެ މާހިރުން ދެކޭގޮތުގައި، ރައީސް މުއިއްޒުގެ މި ދަތުރުފުޅަކީ ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކޮށް، ސަރަޙައްދީ ސުލްޙަ މަސަލަސްކަން ދެމެހެއްޓުމަށް މުހިންމު ދައުރެއް އަދާކުރާނެ ދަތުރުފުޅެކެވެ.

ރައީސް މުއިއްޒުގެ މި ދަތުރުފުޅު ނިންމަވާލެއްވިމަށްފަހު އެނބުރި ވަޑައިގަންނަވާނީ 10 އޮކްޓޫބަރު ވާ ބުރާސްފަތި ދުވަހު ކަމަށް ރައީސް އޮފީހުން ހާމަކުރައްވާފައިވެއެވެ.