ބަންކަރިންގ ބޯޓުތަކުގެ ކުނި މެނޭޖްކުރުމަށް އެމްޕީއެލް އާއި ވެމްކޯ އާއި ދެމެދު އެއްބަސްވުމެއްގައި ސޮއިކޮށްފި

ދިވެހިރާއްޖޭގައި އަލަށް ތަޢާރަފުކުރެވިފައިވާ ބަންކަރިންގ ޚިދުމަތް ހޯދުމަށް ޒިޔާރަތްކުރާ އުޅަނދުފަހަރުގެ ކުނި މެނޭޖްކުރުމުގެ ޚިދުމަތް ފޯރުކޮށްދިނުމަށްޓަކައި މޯލްޑިވްސް ޕޯޓްސް ލިމިޓެޑް (އެމްޕީއެލް) އާއި ވޭސްޓް މެނޭޖްމަންޓް ކޯޕަރޭޝަން (ވެމްކޯ) އާ ދެމެދު މިއަދު އެއްބަސްވުމެއްގައި ސޮއިކޮށްފިއެވެ.

އެމްޕީއެލްގެ ހެޑް އޮފީހުގައި ބޭއްވުނު ޚާއްޞަ ރަސްމިއްޔާތެއްގައި މި އެއްބަސްވުމުގައި ސޮއިކުރެވުނެވެ. މި އެއްބަސްވުމުގެ ދަށުން، އުތުރުގެ މެރިޓައިމް ޚިދުމަތްތައް ހޯދުމަށް ޒިޔާރަތްކުރާ އުޅަނދުފަހަރުގެ ކުނި ނައްތާލުމުގެ ޚިދުމަތް އެމްޕީއެލް އާއި ވެމްކޯ ގުޅިގެން ފޯރުކޮށްދޭނެއެވެ. އެމްޕީއެލްއިން އުޅަނދުފަހަރުން ކުނި ނަގައި، ވެމްކޯއާ ހަވާލުކުރުމުން ވެމްކޯއިން ކުނި މެނޭޖްކުރުމުގެ މަސައްކަތް ކުރިއަށް ގެންދާނެއެވެ.

އެއްބަސްވުމުގައި ސޮއިކުރެއްވުމަށްފަހު ނޫސްވެރިންނާ ވާހަކަފުޅު ދައްކަވަމުން އެމްޕީއެލްގެ ސީއީއޯ މުޙައްމަދު ވަޖީހު އިބްރާހިމް ވިދާޅުވީވީ، މި މަސައްކަތްތައް ކުރިއަށް ގެންދާނީ އެކަމަށް ޚާއްޞަކުރެވިފައިވާ ވަސީލަތެއް ކައިރި ރަށެއްގައި ޤާއިމްކޮށްގެން ކަމަށެވެ. އަދި މި ޚިދުމަތް ފެށުމުން ވެމްކޯ އަދި އެމްޕީއެލް އަށްވެސް އާމްދަނީ އިތުރުވެގެންދާނެ ކަމަށް އޭނާ ވިދާޅުވިއެވެ.

ވެމްކޯގެ މެނޭޖިންގ ޑިރެކްޓަރ މުޖްތަބާ ޖަލީލް ވިދާޅުވީ، އުޅަނދުފަހަރުން ކުނި ނެގުމުގެ އިތުރުން "ބޭނުންކޮށްފައިވާ ތެޔޮ" ވެސް މެނޭޖްކުރުމުގެ ޚިދުމަތް ފޯރުކޮށްދޭނެ ކަމަށެވެ. އަދި މި ޚިދުމަތަށް ޚާއްޞަކޮށް ޤާއިމްކުރެވޭ މަރުކަޒުން ކުނިތައް ކުނބުރުދޫގައި ޤާއިމްކުރެވޭ ސަރަޙައްދީ ކުނި މެނޭޖްކުރުމުގެ މަރުކަޒަށް ގެންދެވޭނެ ކަމަށްވެސް އޭނާ ވިދާޅުވިއެވެ.

މި ޚިދުމަތް ފެށުމާއެކު، ހދ. ކުޅުދުއްފުށީގައި މަސައްކަތްކުރާ މުވައްޒަފުން މެދުވެރިކޮށް ޚިދުމަތް ފޯރުކޮށްދޭނެ ކަމަށާއި، ވެމްކޯގެ ލޭންޑިންގ ކްރާފްޓް ބޭނުންކޮށްގެން ކުނި އުފުލުމުގެ މަސައްކަތް ކުރާނެ ކަމަށް ވެމްކޯއިން މަޢުލޫމާތު ދެއްވާފައިވެއެވެ. އަދި މި ޚިދުމަތް ފުޅާވަމުންދާ މިންވަރަކުން އިތުރު ވަޒީފާގެ ފުރުޞަތުތައްވެސް އުފެދިގެންދާނެ ކަމަށް ވެމްކޯއިން ފާހަގަކުރައްވާފައިވެއެވެ.

އެއްބަސްވުމުގައި ސޮއިކުރެއްވުމަށްފަހު ނޫސްވެރިންނާ ވާހަކަފުޅު ދައްކަވަނީ

އުތުރުގެ ބަންކަރިންގ ޚިދުމަތަކީ ދިވެހިރާއްޖޭގެ އިޤްތިޞާދު ނުވަތަ އާމްދަނީގެ ވަސީލަތްތައް އިތުރުކުރުމަށް ސަރުކާރުން ފަށާފައިވާ މުހިންމު މަޝްރޫޢެއްގެ ގޮތުގައި ފާހަގަކުރެވެއެވެ. މި ޚިދުމަތް ފަށާފައިވަނީ އޮފްޝޯ ގޮތުގައި ޚިދުމަތް ދޭ އުސޫލުންނެވެ. އެމްޕީއެލް މެދުވެރިކޮށް ދޭ މެރިޓައިމް ޚިދުމަތުގެ ތެރެއިން މިހާރު 14 ޚިދުމަތެއް ފޯރުކޮށްދެމުން ގެންދެއެވެ.

މި އެއްބަސްވުމުގެ ސަބަބުން، ރާއްޖޭގެ އުތުރުގައި ފެށިފައިވާ ބަންކަރިންގ ޚިދުމަތް އިތުރަށް ހަރުދަނާވެ، ތިމާވެށްޓާ ރައްޓެހި ގޮތެއްގައި ކުނި މެނޭޖްކުރުމުގެ ނިޒާމެއް ޤާއިމްވެގެންދާނެ ކަމަށް ބެލެވެއެވެ. މީގެ އިތުރުން، މި ޚިދުމަތުގެ ސަބަބުން ރާއްޖޭގެ އިޤްތިޞާދަށް އިތުރު ކުރިއެރުމެއް ލިބި، ވަޒީފާގެ އައު ފުރުޞަތުތަކެއް އުފެދިގެންދާނެ ކަމަށްވެސް އުންމީދު ކުރެވެއެވެ.

މި އެއްބަސްވުމަކީ ދިވެހިރާއްޖޭގެ މެރިޓައިމް ދާއިރާގެ ތަރައްޤީއަށް އެޅޭ މުހިންމު ފިޔަވަޅެއްގެ ގޮތުގައި ފާހަގަކުރެވެއެވެ. މި ޚިދުމަތުގެ ސަބަބުން ރާއްޖޭގެ ބަނދަރުތަކުގެ ޚިދުމަތްތައް ބައިނަލްއަޤްވާމީ ފެންވަރަށް އަރައި، ދިވެހިރާއްޖެއަކީ ކަނޑު ދަތުރުފަތުރުގެ މުހިންމު މަރުކަޒަކަށް ވެގެންދިއުމަށް މަގުފަހިވެގެންދާނެ ކަމަށް ބެލެވެއެވެ.

 މި އެއްބަސްވުމުގެ ދަށުން ކުރިއަށް ގެންދެވޭ މަސައްކަތްތަކަކީ ތިމާވެށި ރައްކާތެރިކުރުމަށާއި، ދެމެހެއްޓެނިވި ތަރައްޤީގެ އަމާޒުތައް ހާސިލުކުރުމަށް އެޅޭ މުހިންމު ފިޔަވަޅެއްގެ ގޮތުގައިވެސް ދެކެވެއެވެ. އަދި މިފަދަ މަސައްކަތްތަކުގެ ސަބަބުން ދިވެހިރާއްޖެއަކީ ތިމާވެށްޓާ ރައްޓެހި، ދެމެހެއްޓެނިވި ގޮތެއްގައި ކުރިއަރަމުންދާ ޤައުމެއްގެ ގޮތުގައި ބައިނަލްއަޤްވާމީ މުޖުތަމަޢުގައި ފާހަގަކުރެވިގެންދާނެ ކަމަށް އުންމީދު ކުރެވެއެވެ.