ޚަބަރު / ވިޔަފާރި
އިސްލާމީ މަރުކަޒުގެ މަސްފެންގަނޑު މަރާމާތުކުރުމަަށް ސްޓެލްކޯއިން ޝައުގުވެރިކަން ފާޅުކޮށްފި

އިސްލާމީ މަރުކަޒުގެ މަސްފެންގަނޑު ހަދާ ސަރަހައްދު- ފޮޓޯ: އިސްލާމިކް މިނިސްޓްރީ

ފަރުދުން
08 އޮކްޓޯބަރު 2024، 03:39
08 އޮކްޓޯބަރު 2024، 03:39
އިސްލާމީ މަރުކަޒުގެ މުންނާރުގެ ތިރީގައި މަސްފެންގަނޑު ތައްޔާރުކޮށް އެތަން މަރާމާތުކޮޮށްދޭން ސްޓެލްކޯއިން ޝައުގުވެރިކަން ފާޅުކޮށްފިއެވެ.
އިސްލާމީ ކަންތައްތަކާއި ބެހޭވުޒާރާއިން ބުނީ، އިސްލާމީ ކަންތައްތަކާބެހޭ ވަޒީރު ޑރ މުޙައްމަދު ޝަހީމް ޢަލީ ސަޢީދު ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީއާއި ބައްދަލު ކުރައްވާފައިވާ ކަމަށެވެ. މި ބައްދަލުވުމުގައި އިސްލާމީ މަރުކަޒުގެ މަސްފެންގަނޑު މަރާމާތުކުރުމަށް ސްޓެލްކޯއިން ޝައުގުވެރިކަން ފާޅުކޮށްފައިވާ ކަމަށްވެސް މިނިސްޓްރީން ބުނެފައިވެއެވެ. އިސްލާމިކް މިނިސްޓްރީން ހާމަކޮށްފައިވާ ގޮތުގައި މިއީ ސްޓެލްކޯގެ ސީއެސްއާރްގެ ދަށުން ކުރަން ބޭނުންވާ މަސައްކަތެކެވެ.
އެކްސްގައި ކުރެއްވި ޕޯސްޓެއްގައި ސްޓެލްކޯގެ އެމްޑީ ފަހުމީ ވިދާޅުވީ ރާއްޖޭގެ ސަގާފީ އަދި ދީނީ ތަންތަން ހިމާޔަތްކުރުމަށް އެހީތެރިވުމުގެ ފުރުސަތުތައް ހޯދުމަކީ އެ ކުންފުންޏަށް ލިބޭ ޝަރަފެއް ކަމަށާއި އިސްލާމީ މަރުކަޒުގެ މުންނާރުގެ ތިރީގައި ވާ ފެންގަނޑަކީ ތާރީހީ މުހިންމު ތަނެއް ކަމުން އެ ތަނަކީ ވަރަށް ހިތްގައިމު ތަނެއްގެ ގޮތުގައި ތަރައްޤީކުރުމަށް ސްޓެލްކޯއިން ޝައުގުވެރިވާ ކަމަށެވެ.
އިސްލާމީ މަރުކަޒަށް 40 އަހަރު ފުރޭ މުނާސަބަތާ ގުޅިގެން މަސްފެންގަނޑެއް ހަދަން އިސްލާމިކް މިނިސްޓްރީން އިޢުލާނެއް ކޮށްފައިވެއެވެ. ނަމަވެސް ފަހުން އެ އިއުލާނު ވަނީ ބާތިލުކޮށްފައެވެ. މިކަމާ ގުޅިގެން ވަޒީރު ޑރ.ޝަހީމް ވިދާޅުވީ އެ އިއުލާނު ބާތިލުކުރަން ނިންމީ ރާއްޖޭގެ މާލީ ހާލަތާއި ގުޅިގެން އެފަދަ މަސައްކަތެއް ބަޔަކާއި ހަވާލުކޮށްގެން ކުރިޔަށް ގެންދިޔުން މިވަގުތު މުނާސަބު ނުވާތީކަމުގައެވެ.