އައްޑޫސިޓީގައި އިންޑިއާގެ ކޮންސިއުލޭޓެއް ޤާއިމްކުރަނީ

އައްޑޫސިޓީގައި އިންޑިއާގެ ކޮންސިއުލޭޓެއް ގާއިމްކުރުމަށް ދިވެހިރާއްޖެ އާއި އިންޑިއާ ދެޤައުމުގެ ދެމެދުގައި މަޝްވަރާކޮށްފިއެވެ. މި މަޝްވަރާތައް ކުރިއަށް ގެންދެވުނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހާރު އިންޑިއާއަށް ކުރައްވަމުންގެންދަވާ ރަސްމީ ދަތުރުފުޅުގައެވެ.

ރައީސުލްޖުމްހޫރިއްޔާގެ އޮފީހުން މަޢުލޫމާތު ދެއްވިގޮތުގައި، ދެޤައުމުގެ އެންމެ އިސްވެރިންގެ މެދުގައި ބޭއްވުނު މަޝްވަރާ ބައްދަލުވުންތަކުގައި، އައްޑޫސިޓީގައި އިންޑިއާގެ ކޮންސިއުލޭޓެއް ގާއިމްކުރުމުގެ އިތުރުން އިންޑިއާގެ ބެންގަލޫރުގައި ދިވެހިރާއްޖޭގެ ކޮންސިއުލޭޓެއް ގާއިމްކުރުމަށްވެސް މަޝްވަރާކުރެވުނެވެ.

މި ބައްދަލުވުމުގައި ދެޤައުމުގެ ދެމެދު ރަސްމީ ވާހަކަތައް ދެކެވުނުކަމަށް ރައީސް އޮފީހުން ހާމަކުރެއްވިއެވެ. އަދި ދެޤައުމުގެ ވެރިން ދެއްވި ޖޮއިންޓް ސްޓޭޓްމަންޓްގައި ރައީސް ޑރ. މުޙައްމަދު މުޢިއްޒު ވަނީ ރާއްޖެއާއި އިންޑިއާގެ ޙާރިޖީ ގުޅުމަށް 60 އަހަރު ފުރުން ފާހަގަ ކުރުމަށް ރާއްޖެ ވަޑައިގަތުމަށް އިންޑިއާގެ ބޮޑުވަޒީރު ނަރެންދުރަ މޯދީ އަށް ދަޢުވަތު އަރުއްވާފައެވެ.

މި ރަސްމީ ދަތުރުފުޅުގައި ކުރިއަށްދާ މަޝްވަރާތަކަކީ ދެޤައުމުގެ ދެމެދުގައި އޮތް ގުޅުން އިތުރަށް ބަދަހިކޮށް، ދެޤައުމުގެ ރައްޔިތުންނަށް ލިބޭނެ ޚިދުމަތްތައް ފުޅާކުރުމަށް އެޅޭ މުހިންމު ފިޔަވަޅެއްކަމަށް ބެލެވެއެވެ. އައްޑޫސިޓީގައި އިންޑިއާގެ ކޮންސިއުލޭޓެއް ގާއިމްކުރުމުން، ދެކުނުގެ ރައްޔިތުންނަށް އިންޑިއާއާ ގުޅުންހުރި ޚިދުމަތްތައް ފަސޭހަކަމާއެކު ލިބިގެންދާނެއެވެ.