މިއަދުގެ މޫސުން ގޯސް، ދިޔަވަރުބޮޑުވާ ވަގުތު ބައެއް ރަށްތަކަށް އުދަ އެރުން އެކަށީގެންވޭ- މެޓް އޮފީސް

ރާއްޖޭގެ ބޮޑު ސަރަޙައްދަކަށް މިއަދުވެސް މޫސުން ގޯސްކަމަށާއި، ދިޔަވަރުބޮޑުވާ ވަގުތު އުދަ އެރުން އެކަށީގެންވާކަމަށް މޫސުމާ ބެހޭ ޤައުމީ އިދާރާއިން ވިދާޅުވެއްޖެއެވެ.

 މެޓް އޮފީހުން ވިދާޅުވީ ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައި ޖެހޭނެކަމަށް ލަފާކުރެވޭކަމަށާއި ވިލާގަނޑުގައި 40 މޭލަށް ވައިގަދަވާނެކަމަށް ލަފާކުރެވޭކަމަށެވެ. މިވަގުތުތަކުގައި ދެކުނުގެ ކަނޑުތައްވެސް ގަދަވާނެކަމަށް އެއިދާރާއިން ވަނީ ވިދާޅުވެފައެވެ.

 ރާއްޖޭގެ ބޮޑު ބަޔަކަށް ގުގުރުމާއެކު ވިއްސާރަވާނެކަމަށާއި ބައެއް ރަށްތަކަށް ގަދަވަޔާއެކު ވާރޭ ވެހުން އެކަށީގެންވާ ކަމަށް އެ އިދާރާއިން މަޢުލޫމާތު ދެއެވެ. އަދި 13 މޭލާ 25 މޭލަށް ވައިގަދަވާނެކަމަށާއި، ވިލާގަނޑުގައި ބައެއް ހިސާބުތަކަށް 50 މޭލަށް ވައިގަދަވާނެކަމަށް މޫސުމާ ބެހޭއިދާރާއިން ހާމަކުރައްވައެވެ. ރާޅުގެ އުސްމިން ހުންނާނީ 5 ފޫޓާއި 8 ފޫޓާ ދެމެދުގައެވެ.

އެ އިދާރާއިން ވިދާޅުވީ ދިޔަވަރުބޮޑުވާ ވަގުތު ބައެއް ރަށްތަކަށް އުދަ އެރުން އެކަށީގެންވާކަމަށެވެ. އެހެންކަމުން ކަނޑުދަތުރުކުރުމުގައި މޫސުމަށް ސަމާލުވެ ރައްކާތެރިކަމުގެ ފިޔަވަޅު އެޅުމަށް އިލްތިމާސްކުރައްވާފައި ވެއެވެ.

ވައިގަދަވާނެ ކަމަށް ލަފާކޮށް ލ.އަތޮޅުން ފެށިގެން އައްޑޫ ސިޓީއާއި ހަމައަށް ހުދު ސަމާލު ވަނީ ނެރެފައެވެ.

.