ދެ ގައުމުގެ ގުޅުން ބަދަހިކޮށް އެކުގައި މަސައްކަތް ކުރާނަން- ޖަޕާނުގެ ބޮޑުވަޒީރު

ރާއްޖެއާގުޅުން ބަދަހިކޮށް ގާތުން މަސައްކަތް ކުރަން ތައްޔާރު ކަމަށް ޖަޕާނުގެ އައު ބޮޑުވަޒީރު ޝިގެރޫ އިޝިބާ ވިދާޅުވެއްޖެއެވެ.

ޝިގެރޫ އިޝިބާ މިހެން ވިދާޅުވެފައިވަނީ، ޖަޕާނުގެ 102 ވަނަ ބޮޑުވަޒީރުގެ މަޤާމުގެ ހުވާ  ކުރެއްވުމުން ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ފޮނުއްވި މަރުހަބާގެ މެސެޖަށް ޖަވާބު ދެއްވާ އެކްސްގައި ކުރެއްވި ޕޯސްޓެއްގައެވެ.

ޝިގެރޫ އިޝިބާއަށް މަރުހަބާ ދަންނަވަމުން ރައީސުލްޖުމްހޫރިއްޔާ ކުރެއްވި ޕޯސްޓުގައި ވިދާޅުވީ، ޝިގެރޫ އިޝިބާގެ ވެރިކަމުގައި ޖަޕާނަށް އިތުރު ތަރައްޤީއާއި ކުރިއެރުން ލިބޭނެކަމަށް ޔަގީންކުރައްވާ ކަމަށެވެ. އަދި ބޮޑުވަޒީރުގެ މަޤާމު އަދާކުރެއްވުމުގައި ކާމިޔާބީއަށް އެދިވަޑައިގެން ރައީސުލްޖުމްހޫރިއްޔާ ވަނީ ޖަޕާނުގެ އައު ސަރުކާރާ ގުޅިގެން ދެ ޤައުމުގެ ޒަމާންވީ ރަހުމަތްތެރިކަމުގެ ގުޅުން އިތުރަށް ހަރުދަނާ ކުރައްވަން މަސައްކަތް ކުރައްވާނެ ކަމަށްވެސް ވިދާޅުވެފައެވެ.

މި ޕޯސްޓަށް ޖަވާބު ދެއްވާ ޖަޕާނުގެ އައު ބޮޑުވަޒީރު ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވި ހެޔޮ ބަސްތަކަށް ޝުކުރު ދަންނަވާ ކަމުގައެވެ. އަދި ކުރިއަށް އޮތްތަނުގައި ދެ ޤައުމުގެ ގުޅުން އިތުރަށް ބަދަހިކުރުމަށް މަސައްކަތް ކުރައްވާނެ ކަމަށާއި އިންޑޯ ޕެސިފިކް ސަރަޙައްދުގެ ޤައުމުތަކުގެ މަސްލަހަތު ހިމެނޭ ކަންކަމުގައި ގުޅިގެން މަސައްކަތް ކުރައްވާނެ ކަމަށްވެސް އެމަނިކުފާނު ކުރެއްވި ޕޯސްޓުގައި ވިދާޅުވެފައި ވެއެވެ.