ޚަބަރު
ޓޫރިޒަމް ޕްރޮމޯޝަން އިވެންޓުގެ ތެރެއިން ރައީސްގެ ދެކަނބަލުން ބޮލީވުޑް ތަރިންނާއެކު ޚާއްޞަ ވަގުތުކޮޅެއް ހޭދަކުރައްވައިފި
ރައީސްގެ ދެކަނބަލުން ބޮލީވުޑް ތަރިންނާއެކު : ފޮޓޯ ރައީސް އޮފީސް
ރައީސްގެ ދެކަނބަލުން މިހާރު އިންޑިއާއަށް ކުރައްވަމުންގެންދަވާ ދަތުރުފުޅުގެ ތެރެއިން ބޮލީވުޑް އިންޑަސްޓްރީގެ މައި ސިޓީ މުމްބާއީގައި ބޭއްވުނު ޓޫރިޒަމް ޕްރޮމޯޝަން އިވެންޓުގައި ބައިވެރިވެވަޑައިގެންނެވިއެވެ. މި ހަރަކާތުގައި އިންޑިއާގެ މަޝްހޫރު ގިނަ ފަންނާނުންތަކެއް ބައިވެރިވިއެވެ.
ހަރަކާތުގައި ބައިވެރިވި ފަންނާނުންގެ ތެރޭގައި ޝިލްޕާ ޝެޓީ، ޝޮނާކްޝީ ސިންހައާއި އޭނާގެ ފިރިމީހާ ޒަހީރު އިގުބާލް، ސަނީ ކޯޝަލް، ކަރިޝްމާ ކަޕޫރު، އަރުބާޒް ޚާން އަދި މަޝްހޫރު މޭކަޕް އާޓިސްޓް ސުރާ ޚާން ހިމެނެއެވެ. މި ފަންނާނުން ރައީސްގެ ދެކަނބަލުންނާ ބައްދަލުކޮށް ރާއްޖެއާމެދު އެބޭފުޅުން ދެކޭގޮތް ހިއްސާކުރިއެވެ.
FARUDHUN EXCLUSIVE - Visit Maldives @visitmaldives@MoTmv@TheShilpaShetty#Maldives #VisitMaldives #SunnySideofLife#Farudhun pic.twitter.com/BENLaPbEqx
— Farudhun (@farudhun) October 8, 2024
ފަރުދުންނަށް ދެއްވި އިންޓަވިއުއެއްގައި ޝިލްޕާ ޝެޓީ ވަނީ ދިވެހިރާއްޖެއާ ދޭތެރޭ ދެކޭ ގޮތް ހިއްސާ ކޮށްފައެވެ. އެގޮތުން އޭނާ ބުނެފައިވަނީ ދިވެހިރާއްޖެއަކީ ޙަޤީޤަތުގައިވެސް ބިމުގައިވާ ސުވަރުގެއެއް ކަމަށެވެ. އަދި މިއީ އަބަދުވެސް ދާހިތްވާ މަންޒިލެއްކަމަށާއި ކޮންމެ އަހަރަކު ރާއްޖެއަށް ޒިޔާރަތްކުރާ ކަމަށެވެ.
މީގެ އިތުރުން ދިވެހިރާއްޖޭގެ އެންމެ ހިތްގައިމު އެއް ކަމަކީ ޕްރައިވަސީ ލިބޭކަމެވެ. އަދި މިކަމުން ޗުއްޓީ އިތުރަށް ފުރިހަމަވެގެން ދާކަމަށް ޝިލްޕާ ވަނީ ބުނެފައެވެ. ޝިލްޕާ އިތުރަށް ފާހަގަކުރި ގޮތުގައި ދިވެހިރާއްޖޭގެ މޫސުން ރީތިކަމާއި، ކާއެއްޗެހި މީރުކަމުގެ އިތުރުން މެހެމާންދާރީ ވަރަށް ފުރިހަމަކަމަށް ބުންޏެވެ.
ޝިލްޕާ ޝެޓީގެ އިތުރުން ސޮނާކްޝީ ސިންހާ އާއި ސަނީ ކޯޝަލް ވެސް ވަނީ ފަރުދުންނަށް ރާއްޖެއާއި މެދު ދެކޭ ގޮތުގެ އިންޓަވިއު ދީފައެވެ.
ފާހަގަކޮށްލެވޭ ކަމަކީ، ކޮންމެ އަހަރަކުވެސް ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ 10 ޤައުމުގެ ތެރޭގައި އިންޑިއާ ހިމެނޭކަމެވެ. ޚާއްޞަކޮށް އިންޑިއާގެ ފަންނާނުންގެ މެދުގައި ރާއްޖެއަކީ ޗުއްޓީ ހޭދަކޮށްލަން އެފަދަ ދެވަނައެއް ނެތް މަންޒިލެކެވެ. މިއަހަރުގެ މިހާތަނަށް އިންޑިއާއިން ރާއްޖެއަށް ލައްކައަކާ ގާތްކުރާ އަދަދަކަށް ފަތުރުވެރިން ޒިޔާރަތްކޮށްފައިވާކަން ފާހަގަކުރެވެއެވެ.
މި ހަރަކާތަކީ ދިވެހިރާއްޖޭގެ ފަތުރުވެރިކަން އިތުރަށް ކުރިއެރުވުމަށާއި، ޚާއްޞަކޮށް އިންޑިއާގެ މާކެޓަށް އަމާޒުކޮށްގެން ކުރިއަށް ގެންދެވުނު މުހިންމު ހަރަކާތެކެވެ.
