ހިލޭ ސާބަހަށް ޤުރުއާން ކިޔަވާދޭ ''މިސްކިތު ޤާރީ ކިލާސް'' ފަށައިފި

އިސްލާމީ ކަންތައްތަކާބެހޭ ވުޒާރާއިން މިސްކިތްތަކުގައި ހިލޭ ސާބަހަށް ޤުރުއާން ކުލާސް ހިންގުމަށް ކުރިއަށްގެންދާ ''މިސްކިތު ޤާރީ ކިލާސް'' ރަސްމީކޮށް ފަށައިފިއެވެ. 

އޮންލައިންކޮށް ކުރިއަށްގެންދިޔަ މި ރަސްމިއްޔާތުގައި ގިނަ ޢަދަދެއްގެ ރަށްތަކުން ވަނީ ބައިވެރިވެފައެވެ. އިސްލާމީ ކަންތައްތަކާއި ބެހޭ ވުޒާރާއިން ވިދާޅުވީ މިސްކިތްތަކުގައި ޤުރުއާން ކުލާސް ހިންގުމަށް  32 ފަރާތަކަށް ހުއްދަ ދެއްވާފައިވާ ކަމަށެވެ. އޭގެތެރޭގައި 23 ރަށަކާއި 3 ޖަމްޢިއްޔާގެ އިތުރުން މާލެ ސަރަހައްދުގެ 5 މިސްކިތް ހިމެނެއެވެ. މި ކްލާސްތައް  29 ތަނެއްގައި ކުރިއަށްގެންދިއުމަށް ވާންޖެހޭ ތައްޔާރީތައް ވެ ނިމިފައިވާ ކަމަށް އެ ވުޒާރާއިން ވިދާޅުވެއެވެ. 

މި ކްލާސްތައް މިއަދުން ފެށިގެން ކުރިއަށްގެންދަން ފަށާފައިވާއިރު، މާލެ، ވިލިމާލެ، ހުޅުމާލޭގެ އިތުރުން، ހއ، ހދ، ނ، ބ، ކ، އއ، އދ، މ، ތ، ލ، ގއ، ގދ، ޏ،އަދި  ސ އަތޮޅުގައި ކުރިއަށްދާނެއެވެ. 

ކްލާސްތައް ފެށުމުގެ ގޮތުން ބޭއްވި އޮންލައިން ބައްދަލުވުމުގައި އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވީ މިއީ ވަރަތް މާތް މަޤުސަދެއްގައި ފެށްޓެވި މަސައްކަތެއް ކަމަށާއި މިފަދަ ކަންކަމަށް މިސްކިތްތައްވެސް އަބަދުވެސް ހުންނާނީ ހުޅުވިފައި ކަމުގައެވެ. އެއާއެކު ކިޔަވަން އަންނަ ކުދިންގެ ސަލާމަތާއި ރައްކާތެރިކަމަށް މުދައްރިސުން ވަރަށް ބޮޑަށް ސަމާލުވާން ޖެހޭނެ ކަމަށާއި އެކުދިންނަށް ރަނގަޅު ތަރުބިއްޔަތެއް ދޭން ވާނެ ކަމަށް ވަޒީރު ވިދާޅުވިއެވެ. ވަޒީރު ވިދާޅުވީ ކުދިންގެ ޖިސްމާނީ އަދި ޖިންސީގޮތުން އަނިޔާ ލިބޭނެ އެެއްވެސް މަގެއް ހުޅުވިގެން ނުވާނެ ކަމަށާއި ކިޔަވައިދެއްވާ ފަރާތްތަކުން މިކަމަށް ޚާއްޞަ ސަމާލުކަމެއް ދެއްވުމަށް އިލްތިމާސް ކުރައްވާކަމަށެވެ. 

ރާއްޖޭގެ ހުރިހައި ރަށެއްގެ މިސްކިތްތަކުގައި ހިލޭ ސާބަހަށް ''މިސްކިތު ޤާރީ ކިލާސް'' ހިންގުމަކީ ރައީސުލްޖުމްހޫރިއްޔާ ޑރ. މުޙަންމަދު މުޢިއްޒުގެ ރިޔާސީ ވަޢުދުފުޅުގައި ހިމެނޭ ކަމެކެވެ.