ތަޢުލީމާއި ޘަޤާފަތާ ގުޅުން ހުރި އެކްސްޗޭންޖް ޕްރޮގްރާމްތައް މެދުވެރިކޮށް ތަޖުރިބާ ޙިއްޞާކުރުމަށް ތައްޔާރު- ޗީފް މިނިސްޓަރ ސިދާރަމަޔާ

ތަޢުލީމާއި ޘަޤާފަތާ ގުޅުން ހުރި އެކްސްޗޭންޖް ޕްރޮގްރާމްތައް މެދުވެރިކޮށް ތަޖުރިބާ ޙިއްޞާކުރެއްވުމަށް ތައްޔާރަށް ހުންނެވިކަމުގައި އިންޑިއާގެ  ޗީފް މިނިސްޓަރ ސިދާރަމަޔާ ވިދާޅުވެއްޖެއެވެ.

އިންޑިއާގެ  ކަރްނާޓަކާގެ ޗީފް މިނިސްޓަރ ސިދާރަމަޔާ މިހެން ވިދާޅުވީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އިންޑިއާގެ ކަރްނާޓަކާ ސްޓޭޓްގެ ގަވަރުނަރު ތަވާރް ޗަންދު ގެހެލޫޓާއެކު ބޭއްވި ޚާއްޞަ ބައްދަލުވުމެއްގައެވެ. މި ބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި، އަނބިކަނބަލުން މެޑަމް ސާޖިދާ މުޙައްމަދާއި ދިވެހި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގެންނެވިއެވެ.

ކަރްނާޓަކާ ސްޓޭޓްގެ ގަވަރުނަރ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއެކު ކުރިއަށް ގެންދެވި ބައްދަލުކުރެއްވުމުގައި، އެ ސްޓޭޓްގެ ޗީފް މިނިސްޓަރ ސިދާރަމަޔާވެސް ބައިވެރިވެވަޑައިގެންނެވިއެވެ. މި ބައްދަލުކުރެއްވުމުގައި ޗީފް މިނިސްޓަރ ސިދާރަމަޔާ ދެއްކެވި ވާހަކަފުޅުގައި، ރާއްޖެއާއި ކަރްނާޓަކާއާ ދެމެދުގައި އޮތް ގާތް ގުޅުމުގެ މައްޗަށް އަލިއަޅުއްވާލައްވައި، ތަޢުލީމާއި ޘަޤާފަތާ ގުޅުން ހުރި އެކްސްޗޭންޖް ޕްރޮގްރާމްތައް މެދުވެރިކޮށް ތަޖުރިބާ ޙިއްޞާކުރެއްވުމަށް ތައްޔާރަށް ހުންނެވިކަމުގައި ވިދާޅުވިއެވެ.

މި ބައްދަލުވުމުގައި ގަވަރުނަރު ވިދާޅުވީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިންޑިއާއަށް ކުރައްވަމުން ގެންދަވާ ފުރަމާނަ ދަތުރުފުޅަކީ ވަރަށްވެސް މުހިންމު ދަތުރުފުޅެއް ކަމަށާއި، އަވަށްޓެރި ދެޤައުމުގެ ގޮތުގައި އޮތް ދިވެހިރާއްޖެއާއި އިންޑިއާގެ  ދެމެދުގައި ދެމެހެއްޓެނިވި ގާތް ގުޅުމު އުފެދިފައިވާ ކަމަށެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ އިންޑިއާ ސަރުކާރުން ދެއްވަމުންގެންދަވާ ދީލަތި މެހްމާންދާރީއަށް ޝުކުރު އަދާކުރައްވާފައެވެ. ރައީސުލްޖުމްހޫރިއްޔާގެ ވާހަކަފުޅުގައި، އެމަނިކުފާނުގެ މި ދަތުރުފުޅުގައި ބޭއްވެވި މަޝްވަރާތަކަކީ ބިނާކުރަނިވި މަޝްވަރާތަކެއް ކަމަށާއި، ޚާއްޞަކޮށް ނިއުދިއްލީ އާއި މުމްބާއީ އަދި ބެންގަލޫރުގައިވެސް ކުރިއަށް ދިޔަ ބިޒްނަސް ފޯރަމްތަކުގެ ކާމިޔާބީގެ މައްޗަށް އަލިއަޅުއްވާލައްވާފައި ވެއެވެ.